Nënshkrime e zgjatje kontratash në futboll: Sampaoli te Argjentina, Falcao zgjat qëndrimin te Monako

Futbolli i luajtur ia lë vendin tani, në muajt e verës, atij që luhet në tavolinë, ku nënshkruhen kontrata të reja, zgjaten ato ekzistueset.

Jorge Sampaoli është zyrtarisht trajneri i ri i Argjentinës. Detyrë në të përpjetë për të, pasi duhet t’u japë zgjidhje problemeve të shumta të përfaqësueses argjentinase, si dhe të ndryshojë rezultatet në kualifikueset amerikanolatine për Botërorin 2018.

Ardhja e tij në krye të Argjentinës qe sugjeruar prej muajsh, por u bë e mundur vetëm pasi Sampaoli u nda nga Sevilja, ekipi spanjoll që drejtoi në këtë sezon.

Për teknikun 57-vjeçar ka një nisje jo fort të këndshme, ndërsa Argjentina do të ndeshet me Brazilin në një miqësore më 9 qershor.

Për të kaluar te lojtarët, Radamel Falcao është shpërblyer për paraqitjet e tij te Monako me një kontratë të re trevjeçare, që do ta mbajë kolumbianin në principatë gjer në 2020-n.

Pas një periudhe të vështirë e trishtuese në futbollin anglez, Falcao rigjeti formën te ekipi francez, duke e ndihmuar atë me golat e tij të fitonte kampionatin.

“Jam i lumtur ta vazhdoj aventurën time te Monako. Pas një sezoni të pabesueshëm ku gjeta motivimin tim, kisha vetëm një dëshirë: ta zgjasja këtë histori të bukur.”

Janë këto fjalët e Falcao-s pas kontratës së re. /tesheshi.com/