Nga Bardha Nergjoni
Imazhi që do të shihni tanimë në rrethrrotullimin e Qafë-Thanës është skulptura e Nënë Terezës. Dikur e keni parë në aeroportin e Rinasit, sot ndodhet në anën tjetër me justifikimin se është afruar drejt vendlindjes së saj në Maqedoni.
Vendimi i Ministrisë së Kulturës që ka zgjedhur pikërisht këtë vend për të vendosur statujën e autorit kosovar Luan Mulliqi, e bërë shpesh pjesë e debateve për braktisjen në oborrin e qendrës së restaurimeve në mes mbetjeve dhe papastërtive, një pamje jo e denjë për një figurën që institucionet shqiptare, ç`prej 20 e kusur vitesh investohen në “shenjtërimin” e saj kombëtar
Mesditën e 14 prillit skulptura e lartë u vendos me një ceremoni pa shumë bujë, gati shfajësuese, duke bërë me “monument kulture” një qytezë si Prrenjasi dhe duke i gjetur më në fund një vend këtij monumenti.
Shtatorja e realizuar nga skulptori Luan Mulliqi si fitues i çmimit të dytë të konkursit të realizuar nga Galeria Kombëtare në vitin 2003 pasi u hoq nga aeroporti “Nënë të Tereza”, qëndroi oborrin e QRVA, me qëllimin për t’u restauruar.
Po a ishte vetëm ky shkaku i zhvendosjes?!
Drejtori i atëhershëm i QRVA, Agim Rada e quajti një vepër e nxituar, realizuar jo në kushte optimale dhe e derdhur në mënyrë difektoze. E braktisur prej vitesh në oborrin e Qendrës së Restaurimit, skulptura u bë objekt i disa reagimeve, ndër të cilat edhe i Forumit të Trashëgimisë Kulturore i cili disa herë e ka ngritur problemin e brakstisjes së këtij monumenti. Së fundi ishte një kronikë e një emisioni televiziv, e cila bëri që të vendosej për skulpturën e Nënë Terezës drejt destinacionit të fundit.
Ministria e Kulturës zhvilloi ceremoninë për vendosjen e statujës pikërisht në segmentin në kryqëzimin që e lidh Shqipërinë me Maqedoninë. Ky vendim u justifikua me faktin se statuja e Nënë Terezës ka fytyrën nga vendlindja e saj.
Në ceremoni merrte pjesë edhe zv. Ministri i Kulturës Zef Cuni si dhe drejtori i QRVA. Fjalën e rastit e mbajti kryetarja e Bashkisë së Prrenjasit Miranda Rira, e cila falenderoi për këtë monument duke e quajtur zonën e Prrenjasit me fat për vendosjen e një figure të këtyre përmasave në territorin e saj. /tesheshi.com/
