Gazetari dhe shkrimtari vlonjat Çlirim Hoxha ka njoftuar në rrjete sociale per ikjen nga kjo botë të Dr. Aleko Pojanit, i njohur si ish-koka e nëndetëseve shqiptare dhe i asaj të famshmes 105.
“U nda sot nga jeta njëri nga komandantët e parë të nëndetëseve shqiptare Dr. Aleko Pojani. Aleko Pojani kreu shkollën ushtarake ‘Skënderbej’ dhe më pas Akademinë e Marinës në Baku të ish-Bashkimit Sovjetik në vitet 50. Aleko Pojani ishte njëri nga komandantët e parë të nëndetëseve shqiptare, i cili me të famshmen 105 kreu misione shëmbullore dhe misterioze në detin Mesdhe. Aleko Pojani ka qenë edhe komandant i Brigadës së Nëndetëseve në Bazën Ushtarako-Detare të Pashalimanit dhe pedagog në Akademinë e Marinës në Vlorë. Aleko Pojani është autor i librit historik ‘Nëndetësja 105, kujtimet e një komandanti’ botuar në vitin 2013 dhe mbante gradën Doktor i Shkencave”, informon kolegu Hoxha.
Nëndetësja 105 u bë e njohur në filmin “Ballë për Ballë”, ku ishte simbol i ndarjes mes Shqipërisë dhe Bashkimit Sovjetik. /tesheshi.com/
