Shoqëria shqiptare po kalon tronditjen e radhës nga përditshmëria e trazuar e saj me lajme të rënda nga kronika, ajo e vetëmbytjes së një gruaje me tre fëmijët e saj, sipas versionit të deritanishëm.
Ngjarja e rëndë ka ndodhur në Shkodër, në ujrat e Bunës, ku Alma Arrazi, së bashku me trë fëmijët e saj, 3, 8 dhe 9 vjeç, janë (vetë)mbytur aty në rrethana ende të pashpjegueshme. E gjitha kjo, siç po raportohet, për shkak se ajo nuk ka duruar dot tradhëtinë e të shoqit, faktin që ai ishte lidhur me një 17-vjeçare.
Megjithatë, tej kësaj arsyeje, ende nuk shpjegohet dot, me psikologë apo gazetarë kronike, se si ka ndodhur vetëhedhja në lum e nënës me tre fëmijë. Pra, se si ajo zemër nëne, paçka plagosjes nga xhelozia, ka shkuar deri në marrje jete të fëmijëve të saj të vegjël. Aspekti i problemeve të rënda psiqike mbetet për momentin i vetmi shpjegim racional i një irracionaliteti të tillë makabër.
Ngjashëm ka ndodhur së fundi dhe në SHBA, në Teksas.
Aty, një nënë i kërkoi djalit të saj 3-vjeçar t’i thoshte lamtumirë babait të tij në kamera disa momente para se ajo ta qëllonte atë dhe më pas ta kthente armën kundër vetes, një ditë para seancës për kujdestarinë e fëmijëve me ish-bashkëshortin e saj.
Savannah Krieger, 32 vjeç, dhe djali i saj Kayden u gjetën të vdekur nga plagët me armë zjarri në kokë në një park në San Antonio më 19 mars.
Disa orë para tragjedisë, autoritetet zbuluan se Krieger kishte hedhur tutje fotot e saj të vjetra të dasmës dhe kishte regjistruar një sërë mesazhesh që paralajmëronin ish-bashkëshortin e saj: “Nuk do të kesh absolutisht asgjë deri në fund të ditës”.
Dhe në sfondin e këtyre lloj ngjarjesh, të cilat rrëzojnë gjithçka, arsye apo ligj, psikologia apo sociologia e PD-së, Oriola Pampuri, shkon në nivelin më të pabesueshëm të të bërit politikë teksa e gjen formulën e zgjidhjes për të tilla raste, më saktë rastin e Shkodrës.
“Ajo që sot nuk bëhet është alokimi i fondeve pikërisht për t’i ardhur në ndihmë grave të dhunuara, duke u siguruar strehë për banim, mundësi për punësim, mundësi për të financuar çerdhen, kopshtin e shkollën e fëmijëve deri në moshën që ata janë të aftë për punë”.
Pra, sipas znj. Pampuri, nëse nëna nga Shkodra do ish trajtuar me fonde, nuk do kishte shkuar drejt vdekjes me tre fëmijët e saj(!!!). /tesheshi.com/
