Ndonëse zyrtarët qeveritarë vazhdimisht janë duke deklaruar se i kanë votat e Listës Serbe për ta votuar Demarkacionin e Kosovës me Malin e Zi, këtë e mohojnë përfaqësues të kësaj partie.
Hiç më larg se dje, këshilltari për media i kryeministrit, Faton Abdullahu, deklaroi për mediat kosovare se Lista Serbe do të votojë pro ratifikimit të Demarkacionit.
Por një ditë pas, Nenad Rashiq, deputet i Listës Serbe e përgënjështroi këshilltarin e Mustafës, duke i quajtur të pavërteta deklarimet e tilla.
“Nuk është e vërtetë kjo”, ka pohuar Rashiq duke mos i komentuar më shumë deklaratat e bëra nga këshilltari i kryeministrit Mustafa.
Demarkacioni dështoi të ratifikohej më 1 shtator pasi kryeministri Mustafa e tërhoqi nga rendi i ditës votimin e tij me arsyetimin se nuk ka pasur kushte. Madje për këtë u fajësua edhe Lista Serbe e cila mungoi në atë seancë.
Kjo e fundit vazhdimisht në deklaratat e tyre ka thënë se asnjëherë nuk janë ftuar nga koalicioni qeverisës për të biseduar rreth kësaj çështje, që nga dita kur edhe është votuar Hashim Thaçi për president.
Ndërkohë, qeveria “Mustafa” edhe pse shprehet e bindur se i kanë votat për ta kaluar Demarkacionin, heziton ta riprocedojë në Kuvend për ratifikim. pikërisht pse nuk është e sigurit se mund ta kalojë këtë projektligj. /tesheshi.com/
