Kur u thanë se do të kishin një fëmijë me cene fizike, çifti i ri ishte i bindur se donin ta mbanin foshnjën pa marrë parasysh me çfarë do ballafaqoheshin. Atyre nuk u interesonte se çfarë ishte ajo që do të dukej ndryshe te fëmija i tyre dhe ishin të gatshëm të bënin çdo sakrificë për të.
Në asnjë moment nuk hezituan; ata e donin foshnjën e tyre edhe pse ajo nuk kishte lindur akoma. Ata ishin të gatshëm për të luftuar defektin çfarëdo që të ishte, dhe kur lindi foshnja, Sarah dhe Chris Heller donin të ndanin historinë e tyre me të gjithë botën me shpresën për të ndryshuar mënyrën se si njerëzit e përjetojnë sprovën kur u vjen në jetë një fëmijë i lindur me probleme, apo thënë ndryshe për t’i motivuar që të ballafaqohen me kurajo me një fat të tillë.
“Ju duhet të jeni krenar për foshnjën tuaj, pa marrë parasysh rrethanat. Ne menduam se njerëzve u duhej treguar se ishte e mundur të merreshin me defektet”, tha Sarah Heller, nëna e një djali të vogël të lindur me çarje të buzës dhe të qiellzës.
Sindroma e çarjes së buzëve ndodh kur indet e caktuara nuk formohen siç duhet, dhe kjo është e mundur të shihet në ultratinguj pas javës së 12-të të shtatzënisë.
Ky dëm nuk është vetëm natyror estetik – mund ta bëjë të vështirë për foshnjat për të ngrënë, pirë, qeshur dhe madje edhe për të marrë frymë. Sidoqoftë, në shumicën e rasteve, ky problem zgjidhet me sukses me operacion, kështu që këta fëmijë mund të kenë një jetë krejtësisht normale.
Sara dhe partneri i saj Chris ishin krenarë për djalin e tyre dhe si shumica e prindërve ndanë fotot e tij në rrjetet sociale pavarësisht defektit që ai kishte. Ata vazhdimisht merrnin fjalë mbështetjeje nga të gjitha anët, por shumë kishte mes tyre dhe aso të vrazhdë dhe të pafytyrë që u vinin në dukje ç’njerëzisht atë që s’shkonte me fëmijën e tyre.
“Vendosa t’i edukoj njerëzit, në vend që t’i sulmoj dhe të grindem me ta, dhe kjo është ajo që unë dua të bëjë Brody kur të rritet. Unë dua të edukoj njerëzit, t’u shpjegoj atyre se çfarë ata nuk dinë dhe që të flasin në vend të fëmijëve që ende nuk kanë zërin e tyre”, tha kjo nënë kurajoze.
Vitin e kaluar, këta prindër e dërguan Brody-n për operacion. E tani, ky vogëlush po normalizohet, edhe pse do të ketë dhe ca ndërhyrje në të ardhmen. /tesheshi.com/
