Nëna që pret t’i dhurojë veshkën së bijës: halli ynë dhe ndihma që presim

Zhurma e aparateve të dializës është bërë tashmë kolona zanore, e trishtë padyshim, e ditëve të saj. Vajza zeshkane vetëm 13 vjeç po lufton ashpër kundër sëmundjes që e ka kapluar e cila e ka rënduar më shumë se kurrë. Elmedina Bellopoja nga fshati Reznik i Vushtrrisë, si asnjëherë më parë pret ndihmën e njerëzve zemërgjerë.

Ajo ka nevojë urgjente për transplantin e veshkës dhe një trajtim i tillë është i pamundur të bëhet në Kosovë; andaj prindërit janë detyruar të kërkojnë ndihmë. Nëna e vajzës, Sadetja, nuk i ndahet në asnjë moment të bijës dhe me lotët që i rrjedhin lutet heshturazi dhe papushim për shërimin e saj. Ajo po bëhet gati që një veshkë të sajën t’ia  kalojë së bijës.

“Më padurim po pres që të vij momenti dhe t’ia dhuroj njërën veshkë shpirtit tim që po dergjet nëpër spitale”, thotë Sadetja duke psherrëtirë për dhembjen e saj prej nëne. Në të tilla raste, nuk është veç sëmundja ajo që ta ngushton gjoksin, por dhe pamundësia financiare për t’ia dhënë hakun detyrimit në bërjen e maksimumit për kthimin e shëndetit të evlatit tënd.

Prindërit e Elmedinës thonë se se është tejet e vështirë për ata që të kërkojnë prej të tjerëve që t’i vijnë në ndihmë vajzës së tyre. “Shohim çdo ditë fëmijë që janë në prag të vdekjes për shkak se nuk kanë para për shërim, e që rast i njëjtë është edhe me vajzën tonë”, thotë Sadetja, e lodhur dhe e pagjumë që mezi qëndron në këmbë duke u kujdesur për vajzën.

Për shërimin e Elmedinës nevojiten rreth 40 mijë euro, ku gjysma e shumës se parave është premtuar nga Ministria e Shëndetësisë, ndërsa pjesa tjetër pritet të mblidhet nga donacionet e ndryshme. Vajza e cila tash e tre javë është në dializë, urgjentisht i duhet të bëjë transplantin e njërës veshkë, ndërkohë që dhe tjetrën e ka fare të pazhvilluar, pasi që nga lindja ka pasur problem të mëdha shëndetësore.

“Që nga lindja, Elmedinën gjithmonë e kemi pasur me problem shëndetësore. Deri në moshën 5-vjeçare nuk ka ec fare; më pas problem i vazhdueshëm në mëlçi derisa sa në një gjendje kome për gati tre muaj”, rrëfen babai i saj.

“Ato kanë qenë ditë të vështira dhe nuk menduam që shpëton. E tash, vetëm tre vite më vonë u zbulua se kësaj asnjëherë nuk i është zhvilluar njëra veshkë, ku si pasojë i është dëmtuar edhe tjetra”, thotë babai i vajzës së sëmurë, një ish-luftëtari i UÇK-së që aktualisht punon mirëmbajtës i shkollës së fshatit

Trajtimi i Elmedina Bellopojës, 13 vjeçe, pritet të bëhet në Spitalin Amerikan në Tiranë nga ku ka marr premtimin se do të kushtojë më lirë se në çdo vend vend tjetër të Evropës.

Aktualisht në Kosovë problem i papërballueshëm mbetet sigurimi i barnave të cilat kushtojnë mjaft e që realisht blihen nga vetë pacientët. Kështu po ndodh edhe tek rasti i Elmedinës, ku që të gjitha barnat duhet të sigurohen nga vetë prindërit.

Elmedina ndodhet e shtruar në Pavionin e Pediatrisë në Qendrën Klinike Universitare të Kosovës. Për shkak të pamundësive financiare, familja është detyruar të hapë edhe një xhirollogari: NLB 1707013500950152 – ku presin ndihmë nga njerëz të cilët kanë mundësi të ofrojnë diç për shëndetin e vajzës së tyre. /tesheshi.com/