Zënka që filloi në fushë e përfundoi në dhomat e zhveshjes, mes Nejmar dhe Kavani, nuk ka përfunduar.
Gazeta spanjolle “Sport” shkruan të martën pasdite, se braziliani i PSG, kërkon të “bëjë ligjin” në skuadër, e të mos jetë thjesht lojtari kryesor i ekipit.
Nisur nga kjo, gazeta hedh “një tymosëse”, sikur Nejmar i ka kërkuar presidencës së PSG, shitjen sa më të shpejtë të uruguajanit.
Diçka e tillë nënkupton një largim të mundshëm të Kavanit në janar, por gjërat nuk janë kaq të thjeshta. 31 vjeçari ka luajtur në Champions League për PSG-në, ndaj asnjë skuadër e madhe që do të donte ta blinte, nuk do të mund ta aktivizonte në kampionatin e më të mirëve.
Nga ana tjetër, në Francë mediat janë përpjekur t’i japin shpjegim zënkës Nejmar – Kavani, duke shkruar se uruguajani ka një klauzolë në kontratë, sipas të cilës, nëse ai shpallet golashënuesi më i mirë i kampionatit, do të përfitonte 1 milion euro shpërblim.
Në ndeshjen kundër Lion, të dy yjet e PSG-së u konfliktuan, për shkak të gjuajtjes së penalltisë, të cilën më pas Kavani e humbi.
Grindja vijoi edhe pas ndeshjes, e “klani” brazilian në skuadër, Dani Alvesh, Markinjos dhe Tiago Silva, kanë ndarë një “kapje me duar” të dy sulmuesve, por kanë mbajtur dhe anën e Nejmar./tesheshi.com/
