Donald Trump ka propozuar juristin 49-vjeçar Neil Gorsuch për anëtar të Gjykatës së Lartë, duke kërkuar të kthejë shumicën konservatore në këtë organ të drejtësisë amerikane.
Propozimi, që vjen pas refuzimit të vitit të shkuar të republikanëve për të shqyrtuar kandidaturën e ish-presidentit Obama, do duhet të marrë miratimin e Senatit, ku pritet një betejë e ashpër.
Gjykata e Lartë e SHBA-së ka një vend bosh që prej vdekjes një viti më parë të konservatorit Antonin Scalia.
Neil Gorsuch është i propozuari më i ri në më shumë se çerekshekulli për Gjykatën e Lartë. Ndërsa anëtarët e kësaj gjykate qëndrojnë në detyrë sa të jenë në jetë, i propozuari nga Trump mund të ketë ndikim në drejtimin e saj në dekadat e ardhshme.
Gorsuch konsiderohet si një intelektual konservator, dhe është i njohur për mbrojtjen e të drejtave fetare.
Trump kërkoi që demokratët dhe republikanët të bashkohen për të mirën e vendit në lidhje me emërimin e juristit të mësipërm, ndërkohë që një numër përfaqësuesish të demokratëve në Senat e cilësuan propozimin si të papranueshëm dhe ekstrem. /tesheshi.com/
