Nga Blendi Gashi
Nehat Thaçi, është emëruar drejtor i përgjithshëm i Shërbimit Korrektues të Kosovës, për një mandat trevjeçar, pasi ka fituar garën kundërkandidatëve të tij, Rasim Selmanaj, drejtor aktual i burgut të sigurisë së lartë, dhe Enver Rrustemi, ish zyrtar i Inspektoratit të policisë dhe ish kandidat i AAK-së për komunën e Vitisë.
Thaçi i cili deri tani ka ushtruar pozitën e drejtorit të policisë për rajonin e Mitrovicës ka zënë vendin e Sokol Zogajt.
Thaçi, në vitin 2006 ngriti në këmbë krejt Kosovën pasi më 29 shtator u arrestua në vendkalimin kufitar në Konçul nga autoritetet serbe, mbi bazën e një fletëarresti të Gjykatës së Lartë në Nish, me dyshimin se kishte kryer krime kundër serbëve në Lipjan në korrikun e vitit 1999, për çka ju caktua masa e paraburgimit prej 30 ditësh.
Ai u transferua në Beograd më 10 tetor, ku u mor në pyetje në Prokurorinë për krim të organizuar, e cila hapi procedurën kundër tij për veprën penale terrorizëm, gjë që ai gjatë intervistimit e hedhi poshtë.
Pas arrestimit të Thaçit, Kuvendi i Kosovës pati miratuar një rezolutë, me të cilën kërkohej lirimi i menjëhershëm, dhe i kërkohej “Bashkimit Evropian që përmes mekanizmave të tij detyrues të ndërhyjë tek Qeveria e Serbisë që të lirohet Thaçi”.
Thaçi u lirua më 1 nëntor pas më shumë se një muaji paraburgimi në Serbi dhe kju u arrit pas përpjekjeve të vazhdueshme të Minisrisë së Jashtme dhe sigurisht trysnisë së faktorit ndërkombëtarë ndaj Serbisë.
Në pikën kufitare në Merdar, ai pas lirimit u prit atë kohë nga ministri i Punëve të Jashtme, Enver Hoxhaj, si dhe nga familjarë të tij.
Thaçi falënderoi institucionet e vendit për gjithë punën e bërë.
“Do të filloj nga nesër t’ia kthej borxhin, me punë, këtij shteti… Faleminderit për mikpritjen dhe faleminderit institucioneve që e mundësuan lirimin tim. Nuk dua të hyj në detaje sesi ka ndodhur arrestimi”, deklaroi Thaçi.
Po sa është pasuria e Thaçit…
Në deklarimin e pasurisë në Agjencinë Kundër Korrupsion, Thaçi ka deklaruar pasuri të paluajtshme në vlerë prej 406 mijë eurove.
Në këtë pasuri hyn një banesë e cila është në emër të Thaçit, një shtëpi, dy toka bujqësore, dy troje, një banesë tjetër, të cilat i ka deklaruar si të përbashkëta.
Thaçi në pasuri të luajtshme ka një veturë të tij e cila kap vlerën 28 mijë euro dhe një veturë tjetër të bashkëshortes së tij e cila kushton 8 mijë euro.
Të hyrat vjetore të drejtorit të ri të burgjeve të Kosovës, kapin shifrën e rreth 22 mijë eurove së bashku me bashkëshorten. /tesheshi.com/
