I dërguari i Angela Merkel-it, kancelares gjermane, David McCalister, që është edhe kryetar i Komisionit të Jashtëm të Parlamentit Europian, ka bërë të ditur se nuk do të niset në Tiranë për të zgjidhur krizën nëse Lulzim Basha nuk jep garanci paraprakisht për heqjen dorë nga bojkoti i zgjedhjeve dhe i parlamentit.
Siç mësohet nga burime pranë opozitës, McCalister ka diskutuar vazhdimisht në telefon me Majlinda Bregun, e cila ka mbajtur kontakte me Lulzim Bashën gjatë gjithë natës së djeshme.
Ende nuk dihet çfarë është vendosur, por dita e sotme do të jetë vendimtare për qëndrimin e eurodeputetit gjerman.
Të hënën, gjithsesi, në Tiranë mbërrin shefi i diplomacisë gjermane, Sigmar Gabriel, por ai nuk do të jetë një negociator.
Përndryshe, Sigmar Gabriel do të përçojë në takimin që do të ketë me Lulzim Bashën qëndrimin e qeverisë së Angela Merkel-it, se një bojkotim i zgjedhjeve do të jetë një hap prapa për Shqipërinë. /tesheshi.com/
