Gjermania i ka thënë “Po” hapjes së negociatave me Shqipërinë, çka e ka detyruar kryeministrin Rama që menjëherë të japë sihariqin, nën delir, duke përdorur gërma kapitale në gati gjysmën e statusit të tij për kërë rast.
“LAJM I MIRË! Faleminderit të gjithë deputetët e CDU/CSU që më në fund VOTUAN PRO HAPJES SË NEGOCIATAVE. Ata qē votuan KUNDËR do t’i bindim në çdo hap me FAKTE se SHQIPËRIA E MERITON hapjen e negociatave. FALEMINDERIT ANGELA për mbështetjen e pakursyer për SHQIPËRINË”, shkruan Rama në FB.
Po “Po”-ja gjermane nuk është dhe aq e prerë. Kjo pasi janë parashtruar një seri kushtesh deri ditën e finalizimit, e ku përfshihet dhe gjetja e një zgjidhjeje për krizën politike.
Në një dokument që shoqëron votimin “Pro”, renditen disa kushte, tek të cilat përfshihet dhe sqarimi i ligjshmërisë së 30 Qershorit, gjë të cilën duhet ta bëjë Gjykata Kushtetuese.
“Zgjedhjet vendore të 30 qershorit 2019 ishin kryesisht paqësore; megjithatë mungon një vendim mbi ligjshmërinë e tyre. Nevojitet një vendim urgjent i Gjykatës Kushtetuese për ligjshmërinë e këtyre zgjedhjeve”, thuhet në dokument, ku renditen më pas kushtet e tjera:
– Zbatimi i ligjit për reformën zgjedhore të iniciuar.
– Fillimi i procedimeve penale kundër gjyqtarëve dhe prokurorëve të cilët nuk u kualifikuan në procesin e vetting-ut për shkak të sjelljes së dënueshme;
– Fillimi i ndjekjes penale dhe eventualisht i proceseve gjyqësore kundër atyre që lidhen me blerjen e votave në zgjedhje, dhe ndjekjen serioze dhe të shpejtë të procedimeve.
– Angazhimi i strukturës speciale për të luftuar korrupsionin dhe krimin e organizuar dhe aftësia e saj për të punuar.
Gjermania ka qenë një ndër skeptiket e një “Po”-je për negociatat me Shqipërinë, e jo pa qëllim, opozita e bëri betejën e saj politikenë median gjermane, duke i çuar atje dosjet me përgjime të rrjedhura nga Prokuroria. /tesheshi.com/
