Gjermania është e përkushtuar t’i japë Ballkanit Perëndimor një mundësi reale për t’u bashkuar, tha të enjten kancelari Olaf Scholz, përpara fillimit të një samiti të BE-së me krerët e gjashtë vendeve të Evropës Juglindore.
“Qytetarët në Ballkanin Perëndimor kanë pritur për gati 20 vjet mundësinë për t’u bërë anëtarë të Bashkimit Evropian”, u tha Scholz gazetarëve.
“Është me rëndësi të madhe që ky të bëhet një premtim i besueshëm, sepse përpjekjet e shumta që kanë bërë këto vende duhet të çojnë përfundimisht në pranimin e tyre”, shtoi ai.
Përpara samitit të rregullt, i cili pret një vendim historik për dhënien e statusit të kandidatit për Ukrainën dhe Moldavinë, liderët e BE-së po bisedojnë me homologët e tyre në Ballkanin Perëndimor.
Liderët pritet të shprehin edhe një herë “angazhimin e plotë dhe të qartë” për perspektivën e anëtarësimit të vendeve në rajon dhe të bëjnë thirrje për përshpejtimin e procesit të anëtarësimit.
Një nga çështjet më të vështira të këtij samiti është përpjekja për heqjen e bllokadës bullgare për hapjen e negociatave me Maqedoninë e Veriut, me të cilën në paketë është edhe Shqipëria.
Bllokadë e turpshme bullgare
Një votë mosbesimi u hodh në qeverinë bullgare të mërkurën, por nga Sofja vijnë indikacione se ata janë gati të heqin bllokadën në bazë të një propozimi francez.
Por pyetja është nëse Maqedonia e Veriut do ta pranojë atë.
Presidenca franceze ka propozuar një kornizë negociuese për Maqedoninë e Veriut që përfshin disa nga kërkesat e Bullgarisë.
Bullgaria ka kërkuar që çështjet që lidhen me historinë e përbashkët, gjuhën dhe identitetin kombëtar të përfshihen në kornizën negociuese për Maqedoninë e Veriut si parakusht për heqjen e bllokadave.
Kryeministri shqiptar Edi Rama e quajti “turp” bllokadën bullgare.
Ai tha se ishte “turp për një anëtar të NATO-s, Bullgarinë” të ndalonte dy vende të tjera të NATO-s, Shqipërinë dhe Maqedoninë e Veriut. /tesheshi.com/
