Në mënyrë krejt të befasishme, pa paralajmërime, Bullgaria ka marrë vendimin që të heq veton ndaj Maqedonisë së Veriut, duke i hapur rrugën kështu edhe Shqipërisë që t’i hapen negociatat. Kjo pasi të dy vendet ishin peng i kësaj vetoje. Bullgaria kishte kërkesa të sferës historiko-nacionale ndaj Maqedonisë fqinje, ngjashëm si Greqia me emrin, por nga kjo e pësonte Shqipëria, pasi Tirana e Shkupi trajtoheshin bashkë nga Brukseli.
Në fakt, është ish-kryeministri bullgar, njëkohësisht dhe kreu i opozitës, Boyko Borisov, i cili i ka kërkuar kryeministrit Krill Petkov që të sjellë propozimin për t’i hapur rrugën hapjes së negociatave për Shqipërinë dhe Maqedoninë e Veriut. Ai është shprehur se 59 deputetët e tij do të votojnë pro.
“I kam kërkuar deputetëve të GERB-it, nëse më besojnë, ta mbështesin propozimin, nëse Petkovi trembet, do të jenë 59 deputetë për t’i dhënë dritën jeshile Maqedonisë dhe Shqipërisë. Siç premtova, të shtunën lexuam tekstet për kornizën negociuese për Maqedoninë e Veriut. Unë besoj te Macron dhe KE, pasi deri më tani gjithçka e mirë që ka ndodhur është falë BE-së”, tha Borisov.
Ka reaguar menjëherë Brukseli, me anë të Komisionerit për Zgjerimin në BE, Oliver Varhelyi.
“Falënderojmë liderin e opozitës Borisov për marrjen e një vendimi historik për Evropën dhe për pranimin e negociatave me Maqedoninë e Veriut bazuar në propozimin francez që lejon vazhdimin me hapjen e negociatave të anëtarësimit me Maqedoninë e Veriut. Ne presim që qeveria t’i bëjë propozimet e nevojshme Parlamentit sot në mënyrë që Evropa të mund të ecë përpara”, ka shkruar Varhelyi, duke lënë të nënkuptuar se kjo është pengesa e vetme për negociatat me Tiranën e Shkupin e se nuk do ketë kusht shtesë.
Ky zhvillim vjen një ditë para një samiti të radhës të Ballkanit Perëndimor dhe një ditë pas kryeministri Rama paralajmëroi se ai dhe homologu maqedonas, madje dhe Vuçiç, mund ta bojkotonin samitin si shenjë rebelimi ndaj BE-së, pikërisht për mos’hapjen e negociatave. /tesheshi.com/
