Ridërgimi i ligjit të Vettingut në Komisionin e Venecias ka riinvolvuar ndërkombëtarët në proces.
Burime diplomatike bëjnë të ditur se ka qenë Lulzim Basha i cili ka komunikuar me ambasadën amerikanë për draftin që ka vendosur ta dërgojë.
Që prej të premtes së shkuar, Basha ka rivendosur kontaktet me ndërkombëtarët e prishur prej disa muajsh dhe mësohet është lidhur direkt me ekspertët e OBDAT-it të cilët i ka vënë në dijeni për draftin ku ai mendon se ka pasur problem në përkthimin në anglisht të amandamenteve të Vettingut.
Dhe thuhet se kanë qenë diplomatët e SHBA që kanë ndërhyrë më pas nëpërmjet rrugëve diplomatike në Romë dhe Strasburg që t’i kërkojnë ekspertëve të Komisionit të Venecias që të shpejtojnë punën edhe ta dërgojnë sa më shpejt materialin drejt Gjykatës Kushtetuese.
Siç mësohet, SHBA dhe BE kanë vënë në dispozicion të anëtarëve të Komisionit të Venecias një grup të madh ekspertësh në redaktim, skanim, përkthim por edhe kërkim praktikash ligjore, në mënyrë që t’jua bëjë të mundur mbylljen sa më shpejtë të punës për të hartuar dispozitivin.
Ambasada e SHBA ka ndërmarrë të gjitha masat që t’ia lehtësojë punën Venecias, që ata të bëjnë vetëm përcaktimin ligjor të verdiktit final në bazë të materialeve të freskëta që atyre u freskohen në kohë reale.
E gjitha kjo është bërë që të mos mbyllet Vettingu pa konsensus siç ka ndodhur, pasi është kërkuar që të arrihet votimi me 140 vota, siç u bë më 31 korrik ku edhe me ndërmjetësimin e presionin e SHBA-së u arrit dakortësia më e madhe e ndodhur ndonjëherë ndërmjet klasës politike shqiptare, pavarësisht se u arrit më shumë me “dajak” se me hir.
Gjykata Kushtetuese e ka dërguar mbrëmë draftin në Komisionin e Venecias, dhe që prej orës 19.00 kur ka mbërritur, një grup prej 20 ekspertësh do ta bëjnë gati për sot në orën 15.00 materialin për t’jua dërguar gjykatësve. Madje mësohet se për të lehtësuar punën, gjykatësve do t’u lexohet materiali, në mënyrë që ata të mendojnë në kohë reale për t’u tërhequr më pas dhe për t’u konsultuar live për verdiktin.
Me t’u dhënë verdikti në vija të trasha, ai do të zbardhet në kohë reale nga ekipi ndihmës, që janë zyra avokatore të specializuara që punojnë me tarifa të kripura, por që në këtë rast paguhen nga BE dhe SHBA.
Më 12 dhjetor, mësohet se Venecia do të cojë tre kopje të materialit: një në Tiranë, një në Bruksel dhe një në Uashington. /tesheshi.com/
