Greqia dhe Turqia filluan bisedimet të hënën, pas një ndërprerje pesë-vjeçare, mbi kërkimin e hidrokarbureve në Egjeun lindor, në një përpjekje për të zgjidhur një mosmarrëveshje që tendos marrëdhëniet midis dy anëtarëve të NATO-s pas një krize të rëndë.
Zv.Ministri i Jashtëm turk Seat Onal priti një delegacion të diplomatëve grekë në Pallatin Dolmabahçe në Stamboll.
Negociatat për kërkimin në Mesdheun lindor janë pezulluar që nga viti 2016 për shkak të rritjes së tensioneve.
Konflikti i gazit natyror ka filluar të ziejë për muaj me radhë midis dy aleatëve fqinjë të NATO-s. Ajo u përshkallëzua pothuajse ushtarakisht vitin e kaluar.
Greqia anëtare e BE akuzon Turqinë për shfrytëzimin e gazit natyror në zonat detare, të cilat, sipas palës greke, mund të shfrytëzohen vetëm nga Greqia.
Bisedimet Ankara-Athinë u mbajtën për herë të parë në shkurt 2002. Tradicionalisht, asnjëra palë nuk ka zbuluar zyrtarisht statusin dhe zhvillimin e negociatave dhe mbetet të shihet se sa të frytshëm janë ato.
Qëndrimet e Ankarasë dhe Athinës
Deri më tani, palët në konflikt as nuk kanë rënë dakord për atë që duan të diskutojnë.
Sipas Ankarasë, të gjitha çështjet e diskutueshme duhet të ngrihen në tryezë, duke përfshirë territoret që i përkasin asaj dhe zonën ekonomike ekskluzive në Detin Egje, si dhe çmilitarizimin e ishujve grekë në brigjet turke dhe ndryshimet në zgjerimin e hapësirës ajrore.
Nga ana tjetër, Athina dëshiron të diskutojë mosmarrëveshjen mbi kërkimin e hidrokarbureve dhe caktimin e brezit kontinental.
Pavarësisht nga ndryshimet, Bashkimi Evropian përshëndeti rinisjen e dialogut si një “shenjë pozitive” për marrëdhëniet midis Ankarasë dhe Brukselit pas disa muaj tensionesh.
Kujtojmë se ky takim mes Athinës dhe Ankarasë, i ideuar për t’u zhvilluar në Tiranë, i atribuohet dhe kryeministrit Rama. Ky i fundit, me pëlqimin e dy palëve, ka negociuar përafrimin e palëve, deri në uljen e tyre në tryezë.
Ndryshe, Rama njihet si mik i afërt i presidentit Erdogan, nga i cili ka marrë mesazhe për t’ja përcjellë Athinës. /tesheshi.com/
