Në një konferencë të përbashkët me znj. Mogherini, kryeministri Rama është detyruar të flasë mbi çështjen e Saimir Tahirit. I pyetur mbi skepticizimin e pretenduar gjerman mbi hapjen e negociatave, ku veçon mosarrestimi i ish-ministrit të Brendshëm, Rama tha se kjo nuk është e vërtetë.
Ai, mbasi e quajti Gjermaninë kampione të përkrahjes së integrimit në BE të vendeve të Ballkanit Perëndimor, porse që dhe atje sipas tij ka plot forca anti-BE, u qas çështjes së ish-vartësit të tij duke e mbrojtur sërish vendimin e mazhorancës që nuk e la Tahirin të përfundonte pas hekurave, me argumentin se nuk ka asnjë provë bindëse kundër tij.
Duke e quajtur Prokurorinë e Krimeve të Rënda që po heton ish-vartësin e tij si larg çdo influence, Rama tha se pak kaq muajsh hetime ende nuk ka asnjë provë ndaj Tahirit.
Nga ana tjetër, Rama i bëri apel opozitës që mos e cenojë imazhin e Shqipërisë në Europë, për interesat e saj politike.
“Shqipëria i ka boll nëpër Europë ata që duan t’i nxjerrin bishta dhe që nuk e kanë problem t’i vënë shkopinj nën rrota. Nuk ka kuptim që t’u bashkohet qoftë edhe një shqiptar i vetëm”
“E ftoj Bashën që të bëjë bashkë një skuadër kombëtare me fanellën kuqezi, kur flasim për Shqipërinë jashtë Shqipërisë. Nuk kam fituar unë, nuk ka fituar qeveria, nuk ka fituar PS, por kanë fituar të gjithë shqiptarët”, theksoi Rama. /tesheshi.com/
