Loja e negociatave me opozitën mbi reformën për drejtësi ende nuk ka përfunduar.
Pas Nuland dhe misionit të saj që solli propozimin hibrid, mbërriti në Tiranë një zyrtare e lartë e Bashkimit Europian, e cila për 48 orë do të udhëheqë bisedimet me opozitën për ta sjellë në tryezë.
Helga Schmid, një diplomate veteran gjermane, e cila është zëvendësja e Federica Mogherinit në Shërbimin e Jashtëm të BE-së, është dërguar në një mision final në Tiranë.
Siç bëhet e ditur nga burime diplomatike, zonja Schmid ka edhe “OK” e kancelares Merkel për të udhëhequr një përpjekje negocimi me kreun e opozitës, Lulzim Basha.
Meqë kreu i PD-së parimisht ka rënë dakord për një mision monitorimi të ndërkombëtarëve për procedin e vettingut, do të përpiqet që të bindet Basha që ky mision nuk është ekzekutiv por përzgjedhës e këshillues.
Në deklaratën e misionit të BE-së në Tiranë pas refuzimit të PD-së për propozimin e znj.Nuland, i bëhet qartë Partisë Demokratike se nuk bëhet fjalë për një pozicion vendimarrës të ndërkombëtarëve.
“Besueshmëria e reformës në drejtësi varet përgjithësisht nga besueshmëria e vetingut të gjyqtarëve dhe prokurorëve. Për ta garantuar këtë, një rol i kufizuar specifik i komunitetit ndërkombëtar përmes Operacionit Ndërkombëtar Monitorues është thelbësor.
Kjo përputhet plotësisht me Opinionin e Komisionit të Venecias që e parashikon këtë rol për Operacionin Ndërkombëtar Monitorues. Propozimi aktual për kompromis reflekton pozicionin tonë të qartë që komuniteti ndërkombëtar duhet të sigurojë monitorim të fuqishëm për të garantuar besueshmërinë e procesit, përfshirë pre-vetingun e anëtarëve të organeve të vetingut, duke dhënë, sipas rastit, rekomandime negative.
Komuniteti ndërkombëtar nuk ka sugjeruar kurrë pasjen e ndonjë pushteti ekzekutiv, meqë është thelbësore që autoritetet shqiptare të ruajnë zotërimin e plotë.
Tani negociatat duhet të mbërrijnë në një konkluzion pozitiv. Kjo do të diskutohet gjithashtu nga Zëvendës Sekretaria e Përgjithshme e Shërbimit Evropian të Aksionit të Jashtëm Helga Schmid gjatë vizitës së saj në Shqipëri sot dhe nesër”, theksohet në deklaratën e misionit të BE-së në Tiranë.
Zonja Helga Schmid, është një diplomate veteran gjermane, e cila përpara se të punojë në Komisionin e Jashtëm dhe të Sigurisë së BE-së, ka qenë këshilltare e dy ministrave të Jashtëm gjermanë dhe drejtuese e disa agjencive federale gjermane.
Helga Schmid ka drejtuar për disa vjet zyrën më të rëndësishme të qeverisë gjermane dhe ka shërbyer si këshilltare e kancelares Merkel si koordinatore e qeverisë.
Ky mision negocimi duket se u ndërmorr pas takimeve që ka pasur ambasadori amerikan Donald Lu me ish-kryeministrin Sali Berisha dhe kreun e PD-së Lulzim Basha, menjëherë ps refuzimit të propozimit hibrid.
Deklarata e Bashës se qëndrimi i opozitës nuk është “Jo” është një shteg i ngushtë , por gjithsesi është një rrugë për negociata.
Diplomacia vepron deri në momentin e fundit duke shfrytëzuar të gjitha shanset, përpara se të arrohet në vendimin final. /tesheshi.com/
