Jo në maj në Zagreb por në mars në Mynih, është ideja e Merkelit për hapjen e negociatave me Tiranën e Shkupin. U konfirmua kjo prej saj gjatë një konference për shtyp në Berlin me kryeministrin Rama.
Ajo shtoi se do të inkurajojë fillimin e negociatave për anëtarësimin e Shqipërisë dhe Maqedonisë Veriore në BE në samitin e Mynihut në mars.
“Mbi të gjitha, ne duam të arrijmë një marrëveshje në mbledhjen e ardhshme të Këshillit Evropian në mars për të filluar negociatat e pranimit me Shqipërinë, si dhe me Maqedoninë Veriore”, tha Merkel.
Ajo shtoi se të dy vendet kanë arritur shumë.
“Tani do të punojmë edhe më shumë për të arritur rezultatet e dëshiruara në mars”, tha ajo.
Kancelarja gjermane Angela Merkel dhe kryeministri kroat Andrej Plenkoviç, vendi i të cilit mban Presidencën e BE-së, kohët e fundit thanë se shpresojnë të shohin një zhvendosje në hapjen e bisedimeve të pranimit me dy vendet, nga maji në mars.
Merkel dhe Plenkoviç diskutuan ngërçin në zgjerimin e Unionit në Berlin gjatë vizitës së kryeministrit kroat në Gjermani pak ditë më parë.
Presidenti i Këshillit Evropian Charles Michel tha javën e kaluar se Unioni do të zhvillojë diskutime intensive në javët e ardhshme se si do të menaxhohet procesi i zgjerimit në të ardhmen,.
Të gjitha vendet anëtare janë “unanime për një gjë, që është se e ardhmja e Ballkanit Perëndimor duhet të jetë drejt Evropës”, tha Michel.
Ai e tha këtë në Tiranë, ku u takua me kryeministrin shqiptar.
Shpresat e Shqipërisë dhe Maqedonisë Veriore për fillimin e negociatave për BE vitin e kaluar u bllokuan në tetor nga Presidenti francez Emmanuel Macron, kur ai kërkoi reformë në procesin e pranimit në BE.
Duke ndryshuar metodologjitë e procesit të pranimit, Franca e sheh si një parakusht për marrëveshjen e saj për hapjen e negociatave me Shkupin dhe Tiranën. /tesheshi.com/
