Kancelari austriak Sebastian Kurz ka qenë gojëmekur teksa ka folur për hapjen e negociatave me Shqipërinë, nga ana e vendeve të BE-së.
Edhe pse personalisht ai i ka vlerësuar reformat e ndërmarra nga qeveria Rama, kur ka ardhur puna që të flasë më qartë nuk ka mundur dot. Dhe si argument ka sjellë atë që ofron dhe Rama, si i përket skepticizmit të disa vendeve: problemet e brendshme.
“Nuk mund t’u japë përgjigje të qartë apo siguri të qartë për këtë, dhe siç e tha dhe kryeministri ka disa shtete anëtare të BE që për shkak të çështjeve të brendshme e kanë të vështirë të marrin këtë vendim, megjithatë ka një dëshirë të fortë në Shqipëri që të shkojë drejt rrugë së reformave. Ajo ka bërë shumë në rrugën e integrimit vitet e kaluara dhe negociatat e pranimit janë drejt një rrugë të mirë dhe ka mundësi të mire, po nuk e di kur mund të merret ky vendim”, tha Kurz.
Në konferencën për shtyp të të dyve, temë qëndrore ka zënë dhe emigracioni ilegal.
“Fluksin e emgirantëve ta ndalojmë para se të shtohen më shumë”, tha Kurz, i cili është pasuar nga Rama.
“Kemi një fluks që rritet në mënyrë shqetësuese që për momentin ka qenë tërësisht i kontrolluar prej nesh. Por na duhet bashkëpunim i ngushtë dhe i mnenjëhershëm për të shmangur skenat që tronditën Europën në vitin 2015 dhe kemi dakordësi të plotë për një bashkëpunim të ngushtë me Austrinë dhe vendet e tjera të interesuara për këtë proces”, theksoi kryeministri Rama. /tesheshi.com/
