“Jo”-ja e negociatave për Tiranën e Shkupin, vijon të përjetohet si “shock” në hapësirën e BE.
Së fundi, kanë qenë krerët e shteteve të Grupit të Vishegradit (V4), të cilat thanë se ishin të zhgënjyer nga Bashkimin Evropian për dërgimin e një sinjali negativ në Ballkanin Perëndimor pas “Jo”-së së negociatave me Shqipërinë dhe Maqedoninë Veriore, por sipas tyre, mund të ketë një shpejtim negociatash me Serbinë dhe Malin e Zi.
Të gjithë jemi të zhgënjyer nga refuzimi i BE-së për të aprovuar hapjen e negociatave me Maqedoninë Veriore dhe Shqipërinë – tha kryeministri hungarez Viktor Orban.
“Meqenëse nuk kemi filluar negociatat me Shqipërinë dhe Maqedoninë Veriore, është e rëndësishme të shpejtojmë negociatat me vendet tashmë në proces”, tha ai.
“Ne mund të rimarrim veten duke përshpejtuar negociatat me Serbinë dhe Malin e Zi, kështu që nuk ka asnjë problem me zgjerimin e mëtejshëm.”
Kryeministrat e Sllovakisë dhe Republikës Çeke u pajtuan me Orban, duke thënë se dhe ata ishin gjithashtu të zhgënjyer.
“Tre vende të BE-së, njëra prej të cilave është themeluese e saj( Franca), e cila kundërshtoi zgjerimin me Ballkanin Perëndimor, ekspozoi qytetarët e rajonit në një rrezik”, tha kryeministri sllovak Peter Pellegrini.
“Ndoshta ata e shohin perspektivën përfundimtare në bashkëpunimin me Rusinë, Turqinë, Kinën ose shtetet arabe … Ky ishte një gabim i madh, sepse besoj se zgjerimi është një investim për BE. Ai është një investim i mirë. Jo vetëm ekonomik, por edhe në siguri”.
Ai paralajmëroi që BE-ja përsëri mund të bjerë në një krizë të re migrantësh për hyrjen në Ballkanin Perëndimor.
“Të gjitha vendet e V4, përfshirë Sllovakinë, gjithmonë do të jenë në anën e vendeve të Ballkanit Perëndimor për t’i mbështetur dhe motivuar ata që të bëjnë çmos për t’u bashkuar me strukturat evropiane”, theksoi Pellegrini. /tesheshi.com/
