Nënkryetari i Partisë Popullore Europiane, David Mcallister dhe kreu i grupit parlamentar i PPE në Parlamentin Europian, Josef Daul, kanë zhvilluar 24 orët e fundit telefonata me kreun e PD-së, Lulzim Basha, për ta bindur që të regjistrohet në zgjedhjet e 18 qershorit.
Sot pritet që të ketë një përpjekje nga ana e Presidentit të zgjedhur, Ilir Meta për të takuar Bashën dhe për t’i bërë ofertën e fundit që PD të ketë mundësi të hyjë në zgjedhje.
Siç mësohet, edhe Ilir Meta, por edhe dy drejtuesit e lartë të PPE-së i kanë bërë të ditur se mazhoranca është e gatshme që t’i qëndrojë angazhimit të marrë një javë më parë, pra që zgjedhjet të shtyhen edhe një muaj, me qëllim që të ketë një reflektim nga ana e opozitës.
Por Basha i ka bërë të ditur se gjatë kontaktit që ka pasur me njerëzit e Ramës, është kryeministri ai që nuk ka pranuar që të lëshojë pe.
Por kjo përgënjeshtruar menjëherë nga kryeministri i cili gjithashtu ka zhvilluar biseda me dinjitarët e lartë të PPE-së si edhe me komisionerin e Zgjerimit, Johanes Hahn.
Ndërsa PD nga ana e saj po insiston që të delegjitimojë 18 qershorin, duke përdorur argumentet e afateve ligjore.
Sot, kjo parti ka nxjerrë tre anëtarët e saj të KQZ-së, për të thënë se shtyrja e afatit deri më 3 maj për regjistrimin e saj në zgjedhje është e paligjshme.
“Tre anëtarët e Komisionit Qendror të Zgjedhjeve (KQZ), informojnë opinionin publik se deklaratat e KQZ të ditëve të fundit (datat 29 dhe 30 prill 2017) nuk përfaqësojnë asnjë vendimarrje të KQZ. Ato janë qëndrime personale në kundërshtim më misionin e KQZ-së, si organi më i lartë shtetëror, i ngarkuar nga ligji zgjedhor për administrimin e zgjedhjeve, si edhe jane tejkalim flagrant i kompetencave të kryetarit të këtij organi.
Fatkeqësisht në deklaratën e datës 29 Prill 2017, jashtë mbledhjes së KQZ dhe në tejkalim të çdo kompetence ligjore, në emër të KQZ, është bërë një interpretim subjektiv i nenit 67 të Kodit Zgjedhor, duke vendosur që “afati i regjistrimit të listave shumemërore të kandidatëve të partive politike, të regjistruara si subjekte zgjedhore për zgjedhjet e datës 18 qershor 2017 […] korrespondon me datën 29 prill 2017”, pavarsisht se në çdo perllogaritje kjo datë duhej të ishte 28 prill 2017, në mesnatë. Rrjedhimisht, çdo rregjistrim për lista të paraqitura nga subjektet tej këtij afati është nul, i paligjshëm dhe i pavlefshëm”.
KQZ nuk mund të krijojë apo ndryshojë afatet ligjore zgjedhore që i ka caktuar Kodi Zgjedhor përmes deklaratave por duhet vetëm t’i zbatojë ato.”
Letra është firmosur nga Hysen Osmanaj, Klement Zguri dhe Vera Shtjefni.
Në fakt data 2 maj është realisht ligjore dhe ka të bëjë me rishikimin e listave të kandidatëve, por PD ka shkelur tre afatet e para, siç janë regjistrimi i partive, që ishte 18 prilli, i koalicioneve por edhe i kandidatëve.
Edi Rama mësohet se u ka thënë ndërkombëtarëve se është gati të bëjë shtyrjen e zgjedhjeve, me anë të një ndryshimi në Kodin Zgjedhor, por pret nga Lulzim Basha që të tregojë gatishmërinë politike se do të hyjë në zgjedhje.
Por nga ana tjetër, lideri i opozitës e kërkon që Rama ta thotë publikisht se do të shtyhen zgjedhjet, për ta përdorur publikisht dhe politikisht këtë si fitore të opozitës dhe “prishje të standardeve kushtetuese” nga Edi Rama, i cili është betuar se nuk do të lëvizë nga afatet kushtetuese. /tesheshi.com/
