Më shumë se pesë orë po zgjasin negociatat midis katër liderëve politik të Maqedonisë dhe eurokomisarit për negociatat për zgjerim, Johannes Hahn, për tejkalim të krizës politike në vend. Sipas paralajmërimeve, është e mundur që bisedat të zgjasin deri pas mesnate, njoftoi korrespondenti i MIA-s nga Brukseli.
Sipas informatave nga takimi në ndërtesën “Berlemont” të Komisionit Evropian, vazhdimisht po ndryshon formati i negociatorëve dhe ekipeve të negociatave. Por, vazhdimisht brenda janë: Nikolla Gruevski (VMRO-DPMNE), Ali Ahmeti (BDI), Zoran Zaev (LSDM), Menduh Thaçi (PDSH), komisari Hajn dhe raportuesi për Maqedoninë nga Parlamenti Evropian, Ivo Vajgl.
Pas drekës së përbashkët, pas orës 15:00, në sallën në katin e gjashtë në Eurokomision janë të pranishëm edhe ambasadorët e Bashkimit Evropian dhe Shteteve të Bashkuara të Amerikës në Shkup.
Informatat janë të pamjaftueshme dhe pothuajse nuk ekzistojnë për atë se çka ndodh brenda. “Ky nuk është takimi i parë. Është në vijim të takimeve të mbajtura më parë, më së fundi, javën e kaluar në Shkup, ku vetë komisioneri deklaroi se një numër çështjesh janë diskutuar dhe është arritur pajtim, por një numër çështjesh të tjera duhet të shqyrtohen më tej. Për këtë arye, u ra dakord që të mbahej ky takim, i cili vazhdon ende dhe për këtë shkak unë nuk mund të jap më shumë detaje. Por, siç e dini, qëllimi është për zgjidhjen e krizës politike në ish-Republikën Jugosllave të Maqedonisë dhe në këtë drejtim shkojnë dhe përpjekjet tona”, deklaroi Maja Koçijançiç, zëdhënëse e KE.
