Maqedonia Veriore dhe Shqipëria mbeten pa “dritën e gjelbër” të vendeve anëtare të nevojshme për të hapur bisedimet e pranimit me Bashkimin Evropian, raporton Al Jazeera.
Gjermania, si kryetari aktual i Këshillit të BE-së, thotë se ka pak kohë për të arritur një konsensus për hapjen e negociatave deri në fund të këtij viti, të paktën për Maqedoninë e Veriut, ndërsa Shqipërisë do t’i duhet të presë presidencën e Portugalisë apo edhe Sllovenisë në gjysmën e dytë të 2021.
Aktualisht, Sofja dhe Shkupi janë pa një marrëveshje mbi kushtet e nevojshme për Bullgarinë për të dhënë “dritën e gjelbër” për kornizën negociuese dhe fillimin e bisedimeve të pranimit të Maqedonisë Veriore me BE.
Një ditë para takimit të ministrave të Punëve të Përgjithshme të BE në Bruksel, ata theksojnë se të gjitha negociatat e mëparshme midis Bullgarisë dhe Maqedonisë Veriore, të cilat përfshijnë presidencën gjermane dhe Komisionin Evropian, nuk kanë rezultuar në një marrëveshje.
“Ministri i jashtëm bullgar vlerësoi se Sofja nuk do të lëvizë pozicionet e saj dhe ne nuk kemi asnjë përgjigje nga Shkupi. Për të bërë përparim, të dy palët duhet të bien dakord, sepse korniza e negociatave kërkon unanimitet në Këshillin e BE, por edhe pëlqimin e vendit që hyn në negociata për pranimi,” tha një diplomat i vjetër i BE.
Në Bruksel, ata kujtojnë se procesi i zgjerimit ishte në krizë vitin e kaluar, i cili rezultoi në një metodologji të përtërirë të pranimit.
Kjo u pasqyrua në kornizën negociuese për Maqedoninë e Veriut dhe Shqipërinë dhe marrëveshja në parim për hapjen e negociatave të pranimit me Shkupin dhe Tiranën u arrit nga vendet anëtare në mars 2020.
“Ajo që mbetet për t’u zgjidhur janë çështjet dypalëshe, të cilat Bullgaria ka ngritur në lidhje me trashëgiminë historike. Bullgaria po kërkon një mënyrë për ta përfshirë këtë në kornizën negociuese për Maqedoninë e Veriut,” shpjegoi diplomati i BE.
Në Bruksel, ata theksojnë se marrëveshjet dypalëshe nuk janë pjesë e negociatave të pranimit dhe se ato mund të bëhen vetëm paralelisht.
Bullgaria, e cila kundërshton “identitetin e maqedonasve”, po kërkon që Shkupi të pranojë “realitetin historik” dhe “të mos shtrembërojë faktet”.
Sofja këmbëngul se gjuha maqedonase ka rrënjë bullgare dhe mund të trajtohet vetëm si “gjuha zyrtare e Republikës së Maqedonisë Veriore”, por jo si “gjuha maqedonase”.
Për më tepër, nga Shkupi kërkohet të përfshijë, brenda kornizës së Kapitullit 35, në negociatat e pranimit me BE, riemërtimin e marrëveshjes së miqësisë të nënshkruar me Bullgarinë, e cila adreson në mënyrë specifike çështjen e pakicave.
Po Tirana?
Për Shqipërinë, e cila po pret gjithashtu konfirmimin e kornizës së saj të negociatave, BE thekson se “nuk ka çështje të hapura bilaterale”, por që ajo ka kushte në lidhje me sundimin e ligjit, të cilat duhet t’i plotësojë për të fituar konsensusin në Këshillin e BE për fillimin e bisedimeve të pranimit.
Megjithëse KE ka dalë me dy kushte për Shqipërinë, që lidhen me funksionimin e plotë të dy gjykatave, asaj Kushtetuese dhe të Lartë, si rishikimit të ligjit Antishpifje, pesë vende të BE thonë se nuk është e mjaftueshme për të rënë dakord për të filluar negociatat me Tiranën.
Këto janë Hollanda, Franca, Gjermania, Spanja dhe Danimarka, të cilat presin reforma më të forta në fushën e sundimit të ligjit nga autoritetet në Tiranë. /tesheshi.com/
