Orë pasi ministri i Jashtëm i Austrisë, Alexander Schallenberg mbështeti hapjen e negociatave me Shqipërinë, pra duke konfirmuar “Po”-në e Vjenës kurrë në diskutim, e lëshuar thirrjen që të gjitha vendet e BE-së të bëjnë të njëjtën gjë, kreu demokrat Basha, pas një takimi me të, pretendoi se kushtet për negociata nuk janë plotësuar(nga qeveria).
“Javën tjetër do të kemi vendimin e Këshillit, ne duam të hapet drita e gjelbër për Shqipërinë dhe Maqedoninë. Ne besojmë se kjo ka të bëjë me kredibilitetin e tij, kushtet janë plotësuar, tani duhet të bëjmë atë që na takon ne. Ne jemi përpara diskutimeve të vështira, nuk ka ende unanimitet, por miqtë tanë shqiptarë mund të mbështeten te ne”, tha kreu i diplomacisë vjeneze.
Por Basha mendon ndryshe. Pas një takimi me Schallenberg, kreu i opozitës deklaroi para medias:
“Ndamë së bashku shqetësimin për qëndrimin e shumë faktorëve evropianë në raport me mosbesimin që ka krijuar qeveria shqiptare duke mos plotësuar kriteret kryesore të hapjes së negociatave. I sigurova që opozita është vendosur të japë kontributin për të tejkaluar këtë krizë politike dhe problemet kryesore të shkaktuara nga kjo krizë dhe nga kjo qeveri, që janë pengesa kryesore për hapjen e negociatave”, tha Basha. Sipas tij, Rama po fajëson padrejtësisht BE-në për fajet e tij.
“Rruga që ka zgjedhur Edi Rama është rruga e gabuar në këtë javë që ka mbetur për marrjen e një vendimi të rëndësishëm për vendin tonë. Është rruga e njohur e sulmeve ndaj BE, ndaj qeverive evropiane, e sulmeve ndaj opozitës, medias dhe madje edhe ndaj qytetarëve, për të hequr përgjegjësinë nga i vetmi përgjegjës për këtë situatë. Dështimi për herë të katërt ka vetëm një emër: Edi Rama. Ai po tregon se është pengesa e vetme për të kaluar këtë krizë”, theksoi Basha. /tesheshi.com/
