Ylli i Alexandre Pato-s nuk shkëlqeu kurrë, sado shpresa që pati për të. Në thuajse gjashtë vite te Milani ai dha veç ca shenja të shpërthimit të tij që nuk ngjau kurrë. Pas kthimit në Brazil, provoi të luante rishtas në Europë, me pesë muaj të kaluar te Çelsi, në Angli, në hije të plotë, i kushtëzuar edhe nga dëmtimet. Kalimi te Vilareali, në Spanjë, qe paksa më i suksesshëm, por, në fund, Pato është pranë kalimit te një skuadër kineze.
Tashmë 27-vjeç, sulmuesi brazilian ka shënuar gjashtë gola gjatë këtij sezoni me Vilarealin, por alternativat e shumta në sulm për skuadrën spanjolle duket ta kenë bërë atë të panevojshëm.
Siç raportojnë mediat sportive spanjolle, Vilareali ka pranuar ofertën për Paton nga klubi kinez Tianxhian Kuanxhian dhe i ka dhënë leje futbollistit ta finalizojë marrëveshjen.
Skuadra kineze gjendet në Itali, dhe Pato raportohet të ketë mbërritur atje për ta konkretizuar lëvizjen. Fabio Cannavaro, një emër i njohur i futbollit italian, është trajneri i ekipit kinez.
Shtypi anglez flet për një kontratë në shifrën e 15.4 milionë paundëve, me një pagesë vjetore për futbollistin prej 4.7 milionë paundësh.
Nëse transferimi merr formë përfundimtare, Pato do t’u shtohet emrave të njohur të futbollistëve që kanë zgjedhur të luajnë në futbollin kinez. /tesheshi.com/
