Presidenti i Venezuelës Nicolas Maduro ka lajmëruar se punonjësit publikë do të punojnë vetëm dy ditë në javë: të hënën dhe të martën. Zyrtarisht, qëllimi i këtij vendimi është kursimi i energjisë elektrike duke mbajtur të mbyllura të gjitha zyrat publike.
Për shkak të thatësirës, diga që prodhon 70% të energjisë elektrike në vend nuk është më në gjendje të përmbushë kërkesat e tregut.
Venezuela ka një nga rezervat e naftës më të rëndësishme në botë, por i gjithë karburanti që nxirret prej saj është i destinuar në transport dhe eksport. Për të përballuar krizën, qeveria më parë e kishte shpallur të enjten si një ditë pushimi për rreth 3 milion punonjës publik si dhe bëri me dije se do të ketë një ndërprerje të përditshme të energjisë elektrike, për 4 orë rresht.
Deri më tani dy kategori janë përjashtuar nga ky rast: punonjësit e spitaleve dhe ata të supermerkateve shtetërore. Për shkak të një krize të rëndë ekonomike dhe të monedhës, në Venezuelë ka prej vitesh mungesë kronike të nevojave themelore të tilla si kafe, sheqer dhe letër higjienike.
Një nga të paktat mënyra për të gjetur këto produkte është bërja e blerjeve në dyqanet shtetërore, ku shpesh duhet të përballesh me radhë të gjata. Punonjësit publik do të paguhen edhe për ditët që do të qëndrojnë në shtëpi. Shumë prej tyre kanë përfituar nga rasti dhe kanë shfrytëzuar ditën e pushimit për të bërë psonisjet në dyqanet shtetërore, në të cilat, në qytetet e mëdha, shpesh herë, duke qenë se përballesh me radhë të gjata, ju duhet të kalojnë një ditë të tërë.
Sipas kritikëve, shkruan Associated Press, kjo masë e marrë nuk shërben për të kursyer energjinë elektrike, pasi punonjësit do të shkojnë në shtëpi, ku do të konsumojnë energjinë elektrike duke parë televizion apo duke ndezur kondicionerin. /tesheshi.com/
