Pas nisjes së goditjeve nga ajri një ditë më herët, mbrëmë avionët turq janë ngritur sërish nga bazat e tyre, duke goditur objektivat e ISIS-it dhe të PKK-së.
Mbi 20 avionë luftarakë F-16 e nisën misionin e tyre pak para mesnate duke u ngritur nga baza e Dijarbakërit. Së pari janë goditur objektivat e ISIS-it, por ndryshe nga një natë më parë, mësohet se bombarduesit turq kanë hyrë në hapësirën ajrore siriane. Një pjesë e avionëve F-16 u drejtuan për në Irakun e Veriut, ku goditën pesë kampe të PKK-së, në Zap, Basjan, Gare, Avashin dhe Metina. Po ashtu u goditën dhe shtabet e PKK-së në malet e Kandilit.
Tre avionë F-16 u ngritën dhe nga baza e Inxhirlikut në Adana, për t’u drejtuar drejt Hatajit dhe Kilisit, në kufi me Sirinë.
Sulmet ajrore u shoqëruan dhe me goditje nga toka. Kështu, artileria e rëndë turke në Kilis nuk reshti së godituri pozicionet e ISIS-it në Siri.
Autoritetet turke lajmëruan dje se nga goditjet ajrore të një nate më parë u vranë 35 militantë të ISIS-it, si dhe u shkatërruan dy shtabe e një pikë grumbullimi. Për rezultatet e sulmeve të mbrëmshme nuk ka ende njoftime.
Këto sulme u pasuan dhe me arrestime në terren. Forca të shumta policore kryen dje në mëngjes herët bastisje të njëkohësishme në 13 provinca të vendit, duke ndaluar 297 persona, përfshirë 37 të huaj.
Kthesa e ngjarjeve pas shpërthimit në Suruç duket se e ka përfshirë tashmë Turqinë në një konflikt pjesë e të cilit nuk ka dashur të jetë. Megjithatë, kryeministri Davutoglu deklaron të kundërtën, “Turqia nuk ka qenë pjesë e ndonjë lufte, dhe nuk do të jetë.”
Ndërkohë presidenti turk konfirmoi dje se vendi i tij ka rënë dakort që SHBA-të të përdorin bazën ajrore të Inxhirlikut për operacione ushtarake kundër ISIS-it. /tesheshi.com/
