Katër vite negociata mes udhëheqësisë së shtetit kolumbian dhe rebelëve të FARC-ut do të kurorëzoheshin javën e shkuar me një marrëveshje paqeje të nënshkruar nga presidenti Juan Manuel Santos dhe udhëheqësi i lëvizjes rebele, Timoleon Jimenez.
Që marrëveshja të quhej e përfunduar kërkohej dhe mbështetja popullore, e referendumi i së dielës për këtë çështje quhej i fituar, duke patur parasysh padurimin e kolumbianëve për paqen e munguar prej dekadash.
Por referendumi ka rezultuar një zhgënjim i vërtetë, me 50.24 për qind të votuesve që kanë votuar dje kundër marrëveshjes.
Fushatën kundër marrëveshjes e udhëhoqi ish-presidenti kolumbian, Alvaro Uribe, i cili doli i fituar. Sipas tij, kolumbianët e donin paqen, por marrëveshja kërkonte rregullime.
Përkundër rezultatit, presidenti aktual i vendit premtoi të mos dorëzohej, duke dhënë fjalën se do të vazhdonte të punonte për arritjen e paqes.
Në të njëjtën frymë ka qenë dhe reagimi i udhëheqësit të FARC-ut, të njohur si Timochenko, i cili deklaroi se lëvizja e tij mbetej e angazhuar për t’i dhënë fund luftës.
Nuk dihet se ç’do të ndodhë më tej, por presidenti kolumbian i ka urdhëruar negociatorët e tij të udhëtojnë drejt Kubës, ku do të bisedojnë me homologët e FARC-ut për hapat e mëtejshëm.
Konflikti 52-vjeçar në Kolumbi mori më herët një kthesë pozitive, teksa rebelët e FARC-ut pranuan të ulin armët e të luftojnë politikisht për aspiratat e tyre. /tesheshi.com/
