Katër orë e dyzet minuta ka zgjatur sot takimi i Këshillit të Sigurisë Kombëtare në Turqi, të pasuar nga mbledhja e Këshillit të Ministrave, e të kryesuara nga presidenti i vendit.
Në një transmetim të drejtpërdrejtë televiziv, ndërsa i tërë vendi kishte mbajtur frymën që në orët e drekës në pritje të vendimeve të MGK-së (Milli Güvenlik Kurulu), Këshillit të Sigurisë Kombëtare, Erdogani deklaroi se në përputhje me nenin 120 të kushtetutës turke ishte shpallur gjendja e jashtëzakonshme.
Në fjalën e tij, të transmetuar gjithashtu në anglisht, frëngjisht e arabisht, presidenti turk bëri me dije se vendimi që e vë vendin në gjendje të jashtëzakonshme për tre muaj ka për qëllim luftën ndaj kërcënimit në rritje të terrorit, e se nuk e shkel as rendin ligjor, e nuk i cenon as liritë bazë të qytetarëve të vendit.
“Qëllimi i gjendjes së jashtëzakonshme është marrja në mënyrë më të shpejtë dhe të efektshme e hapave të nevojshme për të eliminuar kërcënimin ndaj demokracisë në vendin tonë, ndaj sundimit të ligjit, ndaj lirive dhe të drejtave të qytetarëve tanë,” nënvizoi Erdogani.
“Europa nuk ka të drejtë ta kritikojë këtë vendim,” u shpreh ai, duke e shpjeguar lëvizjen me synimin për t’i mbrojtur qytetarët e pafajshëm nga sulmet e mundshme.
Gjendja e jashtëzakonshme hyn në fuqi me botimin e vendimit në fletoren zyrtare. Nën nenin 120 të kushtetutës turke, një gjendje e jashtëzakonshme mund të shpallet në një rajon apo në tërë vendin për një periudhë kohore jo më shumë se gjashtë muaj në rast të treguesve seriozë për akte të përgjithshme dhune që synojnë prishjen e rendit të lirë demokratik.
Erdogani la të kuptohej në një intervistë te Al Jazeera se në javët në vijim mund të kishte tentativa të tjera për grusht shteti. “Nuk mendoj se kemi mbërritur në fund,” u nënvizua në intervistë.
Përpjekja e dështuar për grusht shteti mbrëmjen e së premtes në Turqi u mori jetën 246 personave, e la të plagosur mbi 1.500 të tjerë. Pamjet e njëpasnjëshme filmike që vijojnë të dalin ditë pas dite tregojnë për goditjen e pamëshirshme të civilëve nga puçistët në natën e terrorit.
Turqia vazhdon të mbetet e trazuar nga ngjarjet e fundjavës së shkuar, e kështu ngjan se do të jetë dhe në të ardhmen e afërt. /tesheshi.com/
