Juventus nuk po e do më, por për Dybala-në, radha është bërë e gjatë. Numri 10 i bardhezinjve nuk ia ka mbushur mendjen trajnerit Alegri, i cili e ka lënë në stol në ndeshjet e fundit, duke marrë edhe rezultate pozitive nga lojtarët e tjerë. Edhe vetë Dybala, sikur po ndjen një lloj ftohtësie në Itali, ndaj ka porositur agjentët të nisin kontaktet kudo.
Sipas britanikes “Daily Star”, Manchester United ka kaluar në vend të parë, nisur nga bisedimet e avancuara që ka arritur të bëjë me stafin e argjentinasit. Hyrja prepotente e Red Devils, po e tundojnë keqaz Dybala-n, i cili e ka shprehur edhe më parë dëshirën për t’u stërvitur nga një trajner si Mourinho. 70 milion euro kanë gati në Manchester, për ta marrë fantazistin që në muajin janar.
Por në gjendje alerti janë për mëngjarashin edhe disa klube të tjera të mëdha. Reali i Madridit e kërkon gjithashtu që në janar, Bayern Munich është në pritje me ofertë në dorë, ndërsa Barcelonës sikur i është komplikuar mundësia, për shkak të dualitetit që mund të krijohet me Leo Messin.
Pra, Dybala vazhdon të jetë dëshirë e shumë klubeve, e nuk është cudi të nënshkruajë me një prej tyre, pa pritur të vijë vera. Sepse stoli është humbje e madhe kohe për të, si lojtar që bota e pret të bëjë gjëra të mëdha, falë talentit unik. /tesheshi.com/
