Nga: Bashkim Kastrati
Edhe pse ka ankesa të shumta nga Qendra Klinike Universitare e Kosovës (QKUK) dhe spitalet rajonale se ka mungesë të mjekëve specialistë dhe si pasojë e kësaj paraqiten probleme të ndryshme, rreth 100 mjekë specialistë janë të papunë.
Arsyeja kryesore që këta mjekë janë të papunë është buxheti i limituar që ka Ministria e Shëndetësisë dhe rrjedhimisht është e pamundur që të shtohet numri i mjekëve nëpër klinika dhe spitale.
Në nivelin terciar shëndetësor ka mungesë të theksuar të profesionistëve, sidomos në lëmin e kardiokirurgjisë, anesteziologjisë, hematologjisë, e në shumë fusha të tjera.
Shpesh janë shtyrë operacionet për shkak të mungesës së anesteziologëve dhe kjo ka bërë që të krijohet një radhë e pritjes së pacientëve për t’u operuar. Shembulli tjetër është reparti i Hematologjisë në QKUK, e cila është qendër referente për tërë Kosovën, e ku janë të punësuar gjithsej katër hematologë specialistë.
Ministria do t’i orientojë mjekët të specializohen në fushat ku ka mungesë të kuadrove
Në këtë situatë Ministria e Shëndetësisë ka krijuar një regjistër të specialistëve të papunë për të bërë evidentimin e tyre dhe fushën e specializimit.
Faik Hoti, drejtor i departamentit për informim në Ministrinë e Shëndetësisë, ka thënë për tesheshi.com se me qëllim të krijimit të një regjistri të saktë të mjekëve specialistë që nuk janë të inkuadruar në punë, Ministria e Shëndetësisë ka kërkuar përmes një thirrjeje zyrtare që ata të lajmërohen.
Ai thotë se deri tash, janë rreth 100 specialistë që janë lajmëruar si të papunë, ndonëse për disa prej tyre , Ministria e Shëndetësisë ka informata se punojnë në sektorin privat apo diku tjetër, ndonëse janë deklaruar si të papunë.
“Mjekët e specializuar janë të profileve të ndryshme mjekësore. Regjistri do t’i shërbejë Ministrisë së Shëndetësisë që në të ardhmen, t’i orientojë mjekët që të marrin specializim në ato lëmi ku ka më shumë nevoja, siç janë kardiokirurgjia, anesteziologjia dhe disa profile të tjera”, ka thotë Hoti.
Arsyeja pse është kërkuar që të ketë regjistër për mjekët e papunë, sipas Faik Hotit, bëhet me qëllim që i njëjti regjistër t’i prezantohet më pas Qeverisë së Kosovës, në mënyrë që të bëhen përpjekje për punësimin e tyre.
“Ministria do të përgatisë një projekt, që ky numër i mjekëve specialist gradualisht të punësohen dhe ta japin kontributin e tyre brenda sistemit shëndetësor. Sigurisht, ky numër do t’i prezantohet edhe Qeverisë së Kosovës, por edhe komunitetit të donatorëve edhe aktorëve të tjerë, që do të mund të ndihmonin në zbutjen e papunësisë në mesin e komunitetit të mjekëve”, ka thënë Hoti.
Suficiti i kuadrit mjekësor është shtruar disa herë si temë edhe në Kuvendin e Kosovës nga deputetë të partive të ndryshme politike, duke thënë se mungesa e kuadrove mjekësore ndikon në mirëqenien e përgjithshme të shëndetit publik.
Është raportuar se shumë mjekë janë larguar nga Kosova për në vende të Evropës, sidomos në Gjermani, pasi ky vend ka mungesë të kuadrove mjekësore. Arsyeja e shkuarjes jashtë vendit është paga e vogël e mjekëve specialistë.
Paga e mjekut specialist është rreth 600 euro në muaj, derisa infermieri për punën që kryen, paguhet rreth 300 euro në muaj. Me gjendjen aktuale financiare nuk është e kënaqur kjo kategori e shoqërisë, andaj shumë mjekë punojnë edhe në sektorin privat.
Federata Sindikale e Shëndetësisë pati zhvilluar një anketë, ku del se një mjek specialist ka kërkuar ta ketë pagën e një deputeti, në mënyrë që të punojë vetëm në sektorin publik.
Si rezultat i pagave të ulëta dhe sistemit jo të mirë shëndetësor, vetëm për tre vjet nga Kosova në vendet e Bashkimit Evropian kanë ikur rreth 400 mjekë.
Ndryshe, 120 deputetë të Kuvendit të Republikës se Kosovës, marrin pagë mujore mbi 1500 euro në muaj, derisa gëzojnë edhe të drejta shtesë materiale për çdo aktivitet të tyre.
Në sektorin e shëndetësisë nuk ka nivelizim të pagave. Mjekët, qofshin ata specialistë ose jo, punojnë në shërbimin primar, sekondar apo terciar, paguhen me të njëjtën pagë. /tesheshi.com/
