Nga Mensur Krasniqi
Mos të zëntë festa e Bajramit në qytetin e Shkupit, pasi rrezikon të mbetesh i paqethur dhe i parruar; sigurisht për ata që duan të qethen e të rruhen.
Kjo pasi për vite me rradhë, sallonet e ondulimit – siç u thuhet atje berberhaneve, ose ndryshe floktoreve – para festave të Bajramit janë të stërmbushura. Të duhet të prenotosh gati me ditë përpara, derisa koka juaj t`u dorëzohet gërshërëve.
Është ky një fenomen që kohët e fundit është bërë shumë i pranishëm në Shkup.
Kur afron një festë Bajrami, po të bësh një xhiro rreth e rrotull lagjeve ku banojnë shqiptarët myslimanë të kryeqytetit maqedonas, vërehet qartë një ambient i gjallë me plot fytyra “të reja”, ngaqë gati çdokush shkon në sallonet e ondulimit për të ndërruar imazhin e tij para festës: më shumë se të qethet, të rregullojë flokët dhe mjekrën. Pra si të thuash, t`ju bërë atyre një rimodelim, si të bëhej gati për dasëm.
Portali tesheshi.com ka bërë një bisedë të shkurtër me njërin nga floktarët në sallonin e ondulimit në lagjen ‘Xhon Kenedi’.
Qamuran Elmazi për tesheshi.com sqaron madhështinë dhe bereqetin e kësaj feste fetare të myslimanëve, meqë dhe vet ai nuk mund t’ia dalë në krye me klientët. Dëshmi më të mirë mbi këtë bereqet flet fakti që terminin e fundit për ta qethur klientin e tij e ka në ora 4 të mëngjesit, që është gati koha kur thërret ezani sabahut.
“Nuk e di çka është puna, vetëm para festës së Bajramit zakonisht lokali ynë është i stërmbushur me myshteri. Bereqetin që na sjell kjo festë, vetëm 3-4 ditë që punojmë para kësaj feste, nuk mund të matet me 1 muaj të plotë nga ditët e zakonshme. Ja sot është dita e fundit para festës dhe terminin e fundit për ta qethur një klientë e kam në ora 4 të mëngjesit. Ezani thirr për namaz a unë dal prej dyqani. Ku mbeti Bajrami jem?!”, thotë Qamuran Elmazi, sa i kënaqur nga ky fakt e sa i keqardhur që nuk mundet dot të ketë një angazhim të plotë për t`ju gëzuar vetë festës.
Ai sqaron se ka krijuar marrëdhënie e mira me gjithë klientët dhe se është problem të kthehet pa shërbim ndonjëri prej tyre, edhe përkundër faktit që koha aspak nuk ju premton.
“Unë kam raporte të mira dhe shoqërore me gjithë klientët, dhe ndodh që terminet i kam full 4-5 ditë rresht para festës së Bajramit, a nga ana tjetër presin klientë për të caktuar termin, si do t’ ia dal më thuaj mua ku t`i vendosi, çfarë t’ju bëj”, shprehet floktari.
I angazhuar me punë, nuk ka kohë të ndalet për as gjysmë ore të pimë një kafe dhe të zhvillojmë një bisedë të qetë; ai vazhdon të punon dhe njëkohësisht flet.
Por ai ka një vërejtje për bashkombasit e tij, edhe pse ata ia mbushin xhepin dhe e bëjnë t`i gëzohet punës full, vërejtje që ka të bëjë me diçka genetike:
“Pak është problematike me shqiptarët, çdokush e le për ditën e fundit të Bajramit dhe lajmërohen “Alo Qamqe a ka naj termin”, e ku me pas bre vëlla s’mund t`i dal në qosh as këtyre çka i kam të caktuar me termin. Nga ana tjetër ka edhe prej atyre që nuk respektojnë terminin e caktuar, nuk vijnë me kohë dhe më ngatërrojnë ende më shumë”.
Njëri nga klientët në pritje, kishte përcjellur bisedën tonë dha ndërhyri duke treguar një rast mjaft komik. Pra i njëjti nga pamundësia për t`i qethur dy fëmijët e tij në sallon të ondulimit ditën e fundit para festës së Bajramit, kishte marrë makinën në shtëpi dhe me duart e tij ua ka shkurtuar flokët fëmijëve të vet.
Pra, ky është Shkup i shqiptarëve, ku festat e Bajrameve nisin të ndihen që po afrojnë që nga floktoret e meshkujve, të cilët duan të bëhen të hijshëm për atë ditë. /tesheshi.com/
