Ka dalë në shitje ishulli privat Berg në brigjet e Bigbury, Devon, Angli, ku autorja e famshme, Agatha Christie frymëzoi romanet e saj.
Në ishull ndodhet hoteli me pesë yje “Burgh Island Hotel” i cili është ndërtuar në vitin 1929 dhe ka pritur mysafirë të famshëm si Beatles, Duka dhe Dukesha e Windsor.
Por e ftuara më e famshme, siç shkruan BBC, ishte Agatha Christie, e cila shkroi dy nga romanet e saj: “Dy krime nën diell” dhe “Atëherë nuk mbeti askush”.
Autorja angleze, e cila ishte e famshme kryesisht për veprat e saj detektive, shkroi gjithsej 66 romane dhe 14 koleksione me tregime të shkurtra.
U përfol se ish-presidenti amerikan Dwight Eisenhower dhe ish-kryeministri i Mbretërisë së Bashkuar Winston Churchill u takuan për herë të parë në vitin 1945 në atë hotel.
Siç raporton CNN, ishulli, i cili po shitet nga agjencia e pronave Knight Frank, përshkruhet si pothuajse unik në Mbretërinë e Bashkuar me hotelin një nga shembujt më të mirë të arkitekturës Art Deco në Evropë.
Ofertat fillojnë nga 15 milionë funte.
Pronari i ishullit, Giles Fuchs, pohoi për BBC se ai arriti të rinovonte hotelin. Duke përmirësuar “Burgh Island Hotel”, ai thotë se është tepër krenar për atë që ka arritur.
“Është një pjesë e rëndësishme e historisë së Devon-it dhe jam i emocionuar të shoh se çfarë ka e ardhmja për një nga asetet më të vlefshme turistike të Britanisë”, tha ai.
Ai shtoi gjithashtu se dëshiron të shesë ishullin sepse hoteli është “një zonë kërkuese dhe ai përfundoi duke u marrë gjithnjë e më shumë me të në kurriz të jetës së tij dhe bizneseve të tjera”. /tesheshi.com/
