Ka shpërthyer Ivica Daçiç. Njeriu i Moskës në qeverinë serbe i ka quajtur “nervoze” reagimet dhe propozimet që po bëhen mbi Kosovën nga Presidenti Aleksandër Vuçiç dhe kryeministrja Ana Brnabiç.
Në një deklaratë për Sputnik-un rus, Daçiç deklaroi se ideja e Vuçiç ka shkaktuar ankth në mesin e popullit serb.
“Duhet që të trajtohet edhe ideja ime që kam për veriun e Kosovës dhe për zonën e manastireve, askush nuk mund ta përjashtojë atë. Kam parë nervozizëm për këtë qëndrim, por unw përfaqësoj një pjesë të opinionit serb”, ka thënë Daçiç për Sputnik.
Zv.kryeministri serb është akuzuar nga shefja e tij, kryeministrja Brnabiç që do të ruajë një “konflikt të ngrirë me Kosovën”.
Plani i Daçic është i qartë: ndarja e Kosovës, pra që tre komunat serbe të veriut, Zubin Potok, Leposaviç, Zveçan, por edhe gjysëmbashkinë e Mitrovicës së veriut t’ja atashojë Republikës së Serbisë, duke u dhënë autonomi, serbëve të Deçanit dhe Graçanicës.
“Vetëm kjo zgjdhje do të ofrojë kompromis, asnjë tjetër”, tha Daçiç, me tone të larta për Sputnik, dhe për këtë shtoi se është qëndrimi i Partisë Socialiste të Serbisë, kryetari famëkeq i së cilës ka qenë Sllobodan Millosheviçi.
Kjo përplasje e madhe në Beograd, po lineon në fakt Moskën si pakicë në opinionin serb. Kjo pasi e gjithë opozita jo radikale, por socialdemokratët e Boris Tadiçit dhe liberalët e Jovanoviçit janë dakord për njohjen e shtetit të Kosovës, bashkë me partinë në pushtet, që duhet thënë Vuçiç e kontrollon tashmë mbi 90%, kur e ka larguar edhe de jure Tomislav Nikoliçin nga pushteti.
Daçiçi i frikësohet një referendumi popullor, të cilin Vuçiç ka thënë që do e thërrasë, e i cili mund të japë një rezultat të tmerrshëm për filorusët. Realisht, shumica e opinionit në Serbi, Kosovën e shikon si realitet jashtë Beogradit, ndaj Sputnik po bën sondazhe që dukshëm janë të sforcuara duke u dhënë shifra gjigande, afro 84% të serbëve që gjoja janë për lidhjen me Rusinë.
Tashmë duket se në Podgoricë, Zv.presidenti i SHBA, Mike Pencë e ka ndarë qartë linjën e influencës, ndoshta duke modifikuar edhe Jaltën e famshme.
Dhe kjo u pa edhe dje nga telefonata mes Edi Ramës dhe Rex Tillersonit. Duket se Tirana bashkë me Prishtinën kanë marrë urdhërin që të provojnë lëvizjen e fundit të Vuçiçit, e cila po has në rezistencën e fortë të Moskës.
Një parardhës i Vuçiçit, Zoran Xhingjiç u vra në 2003-shin pikërisht se po niste këtë rrugë, që duket se nuk ka kthim. /tesheshi.com/
