Tre gjyqtarë janë vënë nën hetimin e Prokurorisë së Durrësit, duke qenë se dyshohen për “shpërdorim detyre”, sa i takon rastit të shqyrtimit gjyqësor civil për pronësinë e ish-hotel “Vollga”, i cili aktualisht ndodhet nën pronësinë e Emiljano Shullazit.
Prokuroria e Durrësit, e cila po zhvillon hetime për veprën penale të “Fallsifikimit të dokumentave” mbi mënyrën e tjetërsimit të truallit dhe godinës së ish-“Vollga” në qendër të qytetit, ka konstatuar një vendim të dyshimtë gjykate mbi këtë çështje.
Prokuroria ka konstatuar se në një proces civil, i cili ka zgjatur për disa vite, dy palë kanë pretenduar pronësinë mbi truallin dhe objektin. Konkretisht, Mohammmed Abdullah Bavazeri, përfaqësues i “Saudi Brother Commercial Company” dhe shtetasi Zanmir Hasa, janë përballur në gjykatë me pretendimet e tyre dhe çështja ka arritur deri në Gjykatën e Lartë.
“Ndërkohë që po zhvillohej shqyrtimi gjyqësor në Gjykatën e Lartë, gjykata e Durrësit, për të njëjtin objekt, ka marrë vendimin në bazë të të cilit urdhërohet Hipoteka e Durrësit të regjistrojë si pronar në këtë pronë shtetasin Mohammed Abdullah Bavazer, duke fshirë automatikisht nga regjistri hipotekor emrin Zanmir Hasa, i cili rezultonte deri në atë kohë si pronar pranë ZVRRP Durrës”, – thuet në njoftimin e Prokurorisë së Durrësit.
Mbi vendimin e gjyqtarëve Dhurata Bilo, Vladimir Skënderi dhe Ndue Gjura, hidhet dyshimi se është marrë në kundërshtim të hapur e flagrant me ligjin. /tesheshi.com/
