Udhëheqësit evropianë do të mbajnë një takim të enjten për të rënë dakord mbi një certifikatë për qytetarët e Bashkimit Evropian të cilët janë vaksinuar kundër COVID-19, por anëtarët e BE dihet se nuk janë unanimë për këtë çështje.
Tani që vaksinimi është rritur në të gjithë Evropën, disa qeveri evropiane, të tilla si Greqia dhe Spanja, po kërkojnë miratimin e shpejtë të një çertifikate të BE-së për ata që tashmë janë vaksinuar, në mënyrë që ata të mund të udhëtojnë lirshëm, raporton Reuters.
Por siç është thënë, disa vende, të tilla si Franca dhe Gjermania, nuk janë për këtë ide, sepse arsyetojnë se vendimi për certifikatën do ta bënte të detyrueshëm vaksinimin dhe do të nënkuptojë diskriminim ndaj njerëzve të cilët për arsye të caktuara nuk lejohen ose nuk duan të vaksinohen.
Franca, e cila ka një lëvizje të fortë kundër vaksinimit, ka premtuar të mos detyrojë qytetarët e saj të vaksinohen dhe beson se ideja e pasaportave të vaksinimit është e parakohshme.
Konferenca do të diskutojë gjithashtu situatën epidemiologjike dhe miratimin, prodhimin dhe shpërndarjen e vaksinave.
Udhëheqësit e vendeve anëtare pritet të dërgojnë një mesazh të fortë për kompanitë farmaceutike se ata duhet të veprojnë në përputhje me detyrimet për shpërndarjen e vaksinave kundër COVID-19, theksojnë burimet e BE.
Michel: Lufta kundër COVID-19 vazhdon
Ata thonë se çelësi për të dalë nga kriza e Corona-s do të jetë mundësia e përshtatjes me variante të reja të virusit.
“Lufta jonë kundër pandemisë COVID-19 vazhdon. Lufta është ende sfiduese, për shkak të shfaqjes së varianteve të reja “, thuhet në letrën e ftesës për samitin virtual të Presidentit të Këshillit Evropian Charles Michel.
Ai thekson nevojën për të arritur ekuilibrin e duhur midis kufizimeve dhe lëvizjes së qetë të mallrave dhe shërbimeve në tregun e vetëm. /tesheshi.com/
