Yuri Kim bëri të enjten betimin si ambasadore e Shteteve të Bashkuara në Shqipëri – raporton VOA.
Zonja Kim, u emërua nga Presidenti Donald Trump në qershor të këtij viti. Ajo ka thënë se do të nxisë udhëheqësit e Shqipërisë për të zgjidhur ngërçin aktual politik në mënyrë që të forcohet perspektiva e hapjes së negociatave të anëtarësimit në BE.
Zonja Kim ka thënë gjithashtu se do të inkurajojë Shqipërinë të zbatojë plotësisht reformat në drejtësi. Ajo është shprehur se sheh si përparësi edhe ndihmën teknike për Shqipërinë në hetimin, ndjekjen dhe ndëshkimin e korrupsionit dhe krimit të organizuar ndërnacional.
Yuri Kim është gruaja e parë koreano-amerikane që përfaqëson SHBA në postin e një ambasadori dhe personi i parë nga territori amerikan i Guamit që shërben në një post të tillë. Ajo ka lindur në Kore dhe është rritur në ishullin Guam, një territor i SHBA në Oqeanin Paqësor.
Ajo ka shërbyer në Departamentin e Shtetit si Drejtore e Zyrës së Çështjeve të Evropës Jugore, ka qenë drejtoreshë e Qendrës së Departamentit të Shtetit për Studimin e Diplomacisë, Shefe e Stafit për Zëvendëssekretarin e Shtetit dhe Drejtore e Zyrës për Sigurinë Evropiane dhe Çështjeve Politiko-Ushtarake, sipas asaj ccfarë transmeton VOA në shqip.
Shqipëria është pa ambasador amerikan që pas nga largimi i Donald Lu-së, njeriut që u morr fort me Reformën në Drejtësi, duke ngjallur dhe një urrejtje në disa anekse të politikës, sidomos asaj opozitare.
Rolin e zërit kryesor përfaqësues të SHBA-së në Shqipëri gjithë këto kohë, e ka luajtur e Ngarkuara me Punë Leyla Moses-Ones. /tesheshi.com/
