Rrugët dhe sheshet e kryeqytetit të Maqedonisë, Shkupit këto ditë janë në pritje të përballjes së dy “gjigandëve” evropianë, Manchester United dhe Real Madrid, të cilët nesër do të masin forcat e tyre në Filip II Arena në Superkupën e Europës.
Në rrugët e Shkupit po dominojnë flamujt e fituesit të vitit të kaluar të Champions League, Real Madrid dhe fituesit të Ligës së Evropës, Manchester United. Në tregun e Maqedonisë janë vendosur edhe zona të tifozëve (fan zone), ndërkohë që tifozët e të dy ekipeve po arrijnë nga e gjithë bota, të cilët me padurim po presin ndeshjen e së nesërmes.
Luciano Coutinho nga Brazili tha se pavarësisht se Shkupi ndodhet shumë larg nga vendi i saj, ka ardhur këtu nga dashuria për futbollin.
“E dua shumë futbollin, prandaj kam udhëtuar distancë kaq të largët. Sigurisht, jam këtu për të parë Real Madridin,” tha ajo.
Marton Kovatz arriti në Shkup nga Budapesti, kryeqyteti i Hungarisë.
“Shpresoj të shohim një ndeshje të mirë me shumë gola. Jam për herë të parë këtu në Shkup, është një qytet vërtetë i bukur”, tha Kovats.
Zoltan Gyuris, po ashtu hungarez, tha se nuk simpatizon në mënyrë të veçantë as “Klubin Mbretëror” e as “Djajtë e Kuq”. /tesheshi.com/
