Një raund i ri bisedimesh për Sirinë, i treti në radhë, pritet të nisë nesër në kryeqytetin e Kazakistanit me gjithë kërkesën e opozitës siriane për ta shtyrë takimin.
Rusia, Turqia dhe Irani janë në përgatitje për këtë raund të ri bisedimesh, deklaroi ditën e sotme ministri i Jashtëm kazak, Kairat Abdrakhmanov, duke pohuar po ashtu se delegacionet kanë nisur të mbërrijnë tashmë.
“Po presim konfirmimet nga palët e tjera në takim,” tha ai në parlamentin e vendit të tij, ndërkohë që grupet kryengritëse kërkuan javën e shkuar shtyrjen e bisedimeve dhe kushtëzimin e tyre me respektimin e armëpushimit.
Në takimin e janarit në Astana, Rusia, Turqia dhe Irani u pajtuan për një mekanizëm trepalësh për garantimin e respektimit të armëpushimit në Sirinë e shkatërruar nga lufta tanimë gjashtëvjeçare.
Në Gjenevë po ashtu janë zhvilluar të tjera bisedime mbi Sirinë, nën kujdesin e OKB-së. /tesheshi.com/
