Arsenali është në një prej sezoneve më të vështira; në pozitën më të vështirë gjendet dhe Arsene Wenger, francezi që e drejton këtë skuadër prej shumë vitesh.
Eliminimi në Champions League, dhjetë golat e pësuar ndaj Bajernit të Mynihut, shtatë humbjet në kampionatin anglez, më e fundit ajo e djeshmja ndaj Uest Bromuiçit, e kanë sjellë në udhëkryq të ardhmen e Wenger-it.
Pas humbjes së katërt në pesë takimet e fundit të Premier League-s, e me perspektivën e mbetjes jashtë katërshes kryesuese për herë të parë që prej ardhjes së tij te Arsenali në 1996-n, Wenger e pranon se ekipi gjendet në situatën më të ndërlikuar të njëzet viteve të fundit.
Kontrata e tij mbaron në fund të sezonit, dhe për të ka në pritje një marrëveshje të re dyvjeçare, por askush nuk e do më Arsene Wenger-in në krye të Arsenalit.
Vetë ai ka deklaruar pas humbjes së djeshme se do ta bëjë shpejt të ditur vendimin e tij.
“E di se çfarë duhet të bëj. Shpejt do ta mësoni.”
Në një analizë të tij, ish-sulmuesi i Anglisë, Alan Shearer, e përkthen këtë si lajmërim të largimit të Wenger-it.
“Duket një njeri i thyer,” thotë ai për teknikun 67-vjeçar.
E sa për lojtarët e Arsenalit, Shearer mendon kësisoj: “Duke gjykuar nga kjo paraqitje, e nga paraqitjet e fundit, ata nuk e duan atë në këtë punë. Atyre u mungon zemra, u mungon lufta, u mungon drejtimi.”
Arsenalin nuk e ndihmon as kalendari, me ndeshje të vështira përpara, siç është më së pari ajo ndaj Mançester Sitit. Wenger duket se po bën gati valixhet, duke e ndjerë se është në fund të rrugëtimit të përbashkët me “topçinjtë”, që vetëm të tillë nuk janë më. /tesheshi.com/
