Rusia filloi sot manovrat e përbashkëta ushtarake me Bjellorusinë, duke i cilësuar si vetëmbrojtje e pastër, por disa nga vendet anëtare të NATO-s janë shprehur të shqetësuara.
Moska po përpiqet të ulë shqetësimet në lidhje me manovrat që mbajnë emrin e e koduar “Zapad-2017” (Perëndim-2017), që do të përfshijë rreth 12 700 ushtarë, përgjatë një jave, përgjatë kufirit me Lituaninë dhe Poloninë.
Në komunikatën që njofton fillimin e manovrave, Ministria ruse e Mbrojtjes nënvizoi se ato do të kishin vetëm një karakter mbrojtës dhe nuk i drejtoheshin asnjë vendi në veçanti.
Ushtria organizon çdo vit në këtë periudhë manovra në rajone jashtë Rusisë.
Këtë vit ato zhvillohen në Bjellorusi, në enklavën e Kaliningradit dhe në disa rajone të veriperëndimit të Rusisë.
Stërvitja po kryhet pranë Polonisë dhe vendeve balltike, të cilat që prej aneksimit të Krimesë në vitin 2014 dhe shpërthimit të konfliktit në lindje të Ukrainës kanë denoncuar Rusinë si një kërcënim potencial për sovranitetin e tyre.
SHBA nga ana tjetër kanë zbarkuar mjete ushtarake në Poloni, të cilat do të qëndrojnë deri në përfundim të stërvitjes së përbashkët Rusi-Bjellorusi. /tesheshi.com/
