Për sulmin ndaj autobusit të Borusias së Dortmundit të martën u tha se ishte vepër e “islamistëve”, diçka që nuk pohohet nga hetuesit gjermanë, që shprehen se ka dyshime domethënëse për këtë.
Autorësinë e sugjeronin tre letra të gjetura pranë vendit të ngjarjes e të shtypura në gjermanisht, ku thuhej se shpërthimet ishin kryer në “emër të Allahut”!
Për hetuesit, që kanë parë gjëra të dyshimta në formulimin e letrave, ato mund të jenë një përpjekje për t’i bërë njerëzit të besojnë se sulmi mund të ishte vepër e ISIS-it apo diçka e ngjashme.
Një zëdhënëse e zyrës së prokurorit federal e konfirmoi raportimin e transmetuesit ARD mbi dyshimet për letrat e gjetura në vendngjarje.
Përkundër kësaj, gazetës gjermane Tagesspiegel i ka shkuar një letër anonime të premten përmes postës elektronike ku merrej përgjegjësia për sulmin e ku bëheshin kërcënime raciste.
Hetuesit gjermanë thonë se shpërthimet mund të jenë vepër e ekstremistëve, të majtë apo të djathtë, ose e huliganëve të futbollit. /tesheshi.com/
