Njësia Operacionale e Policisë Rrugore, një strukturë e posaçme e ngritur me qëllim ndëshkimin e shkeljeve të rënda, edhe në zona ku strukturat lokale kanë vështirësi për arsye familjariteti, po monitoron prej rreth 1 muaji të gjitha akset rrugore.
“Puna e njësisë është të jetë e pranishme në gjithë territorin e vendit. Konstatimet kryesore janë që shkak për aksidente bëhen shpjetësia tej normave, parakalimet e gabuara dhe kundravajtjet apo mungesa e rripit të sigurimit”, deklaron Luan Lami, përgjegjës i njësisë, raporton TCH.
Gjatë kësaj periudhe kjo njësi ka pezulluar më shumë se 500 leje drejtimi, mes të cilëve edhe zyrtarë të lartë.
Sipas burimeve, patenta i është pezulluar edhe një deputeti, një prokurori dhe disa zyrtarëve të shërbimit diplomatik pasi shkeljet regjistrohen në sistem në mënyrë automatike.
Mes personave që janë ndëshkuar janë edhe 70 shtetas të huaj. Edhe vetë njësia e posaçme mbikëqyret direkt nga Drejtoria e Përgjithshme e Policisë së Shtetit, duke i hequr kështu çdo mundësi tolerimi në rastet kur shkelësit e ligjit njihen me policët. /tesheshi.com/
