Në mesin e një impasi politik kur opozita është jashtë Kuvendit dhe përplasjet PS-LSI, kanë qenë të përditshme, mazhoranca qeverisëse ka arritur 88 vota në Kuvend ku ka kaluar disa nga ligjet kushtetuese të Reformës në Drejtësi.
Ato janë pjesë e paketës prej 27 ligjesh që rregullojnë funksionimin e institucioneve të sistemit të Drejtësisë.
Me të njëjtin rezultat votimi, 88 vota, deputetët miratuan miratuan të 7 aktet ligjore, konkretisht ndryshimet në ligjin “Për mbrojtjen e dëshmitarëve dhe bashkëpunëtorëve të drejtësisë”; ndryshimet ne Kodin e Procedurës Penale, ato në Kodin Penal; Kodin e Drejtësisë për të Mitur; ndryshimet në Kodin e Procedurës Civile, pr/ligji “Për organizimin dhe funksionimin e gjykatave administrative dhe gjykimin e mosmarrëveshjeve administrative”, si dhe pr/ligji “Për organizimin dhe funksionimin e Ministrisë së Drejtësisë”.
Të 7 aktet ligjore kanë të bëjnë me thelbin e funksionimit të sistemit dhe me dhënien e drejtësisë për qytetarët.
Gjithashtu, Kuvendi miratoi me 86 vota projektligjin “Për lirimin e frekuencave të dixhital – dividentit”, ndërsa pr/ligji “Për fshirjen e pjesshme të detyrimeve tatimore, detyrimeve në doganë si dhe procedurën e heqjes nga qarkullimi të mjeteve të transportit pas fshirjes së detyrimeve tatimore” u miratua me 86 vota pro dhe dy vota kundër.
Me 87 vota u miratua dhe një ndryshim në ligjin “Për nëpunësin Civil”, i mbartur nga seancat parardhëse.
Të hënën e kaluar në mbledhjen e grupit parlamentar të PS-së, Gramoz Ruçi kërkoi nga deputetët të jenë prezent në seancën parlamentare të së enjtes për të votuar ligjet e reformës në drejtësi./tesheshi.com/
