Shqipëria synon një garë Formula Uno, pikërisht në pistën që po ndërtohet në Elbasan.
Ambicien e madhe në vendin ende më të varfër të Europës, e potencoi Blendi Gonxhe, kreu i DPSHTRR-së, jo vetëm një zyrtar shteti për qarkullimin e transportin rrugor, por dhe një i apasionuar pas makinave.
“Elbasani ka punë, është një kantier i madh, 700 mijë metra katrorë kantier. Po punohet që të kapen standardet dhe do të lobojmë për Formula Uno në vjeshtën e vitit 2028”, tha Gonxhe në një prononcim televiziv në A2 CNN.
“Pista e Elbasanit do të ketë të gjitha standardet, me ‘paddock’-un, me muzeun retro dhe me kapacitetet që do të përballojnë deri në 90 mijë shikues në një ditë, që do të thotë 270 mijë për 3 ditë”, shtoi Gonxhe.
Siç tha ai, puna kryesore që po bëhet është që pista të përmbushë të gjitha standardet shumë të larta të një gare F1.
“Po punojmë për kapjen e këtyre standardeve dhe që të aplikohet për garë duhet të kemi auto moto parkun deri në vitin 2027 të ndërtuar dhe po punohet me akseset, që janë rrugët lidhëse apo pritat lumore. Të gjitha janë investime të mëdha që transformojnë komplet zonën atje”, theksoi më tej Gonxhe. /tesheshi.com/
