Vazhdon fushata postzgjedhore e partisë opozitare maqedonase, LSDM-së. Kjo parti nëpërmjet një njoftimi për media ka shpalosur projektin e rradhës duke premtuar pension për të gjithë shtetasit e Maqedonisë në moshë të shtyrë, pavarësisht faktit nëse gjatë jetës së tyre nuk kanë asnjë vit përvojë në punë. Me këtë LSDM thotë se do të ndryshojnë situatën momentale të të uriturve dhe të personave të sëmurë të moshuar, të cilët nuk kanë financim që të kujdesen për vetën pasi që nuk plotësojnë kushtet e pensionit.
“Të gjitha gratë që mbushin 62 vjet dhe burra që mbushin 64 vjet dhe nuk plotësojnë kushtet për pension, do të fitojnë pension social. Të drejtën e pensionit shtetëror do ta kenë banorët të cilat 20 vitet e fundit kanë jetuar në Maqedoni. Pensioni shtetëror social do të jetë 40 për qind i mesatares së pensionit të moshës. Banorët mbi 65 vjeç pa marrë parasysh se a i plotësojnë kushtet për pension, do të marrin këtë pension sepse secili meriton të ketë një plakje të dinjitetshme”, thuhet në njoftimin e LSDM-së.
Ndryshe, LSDM është në pritje që të marrë mandatin për formimin e qeverisë si parti e dytë fituese e zgjedhjeve, vetëm në rast se VMRO-DPMNE si parti fituese e zgjedhjeve nuk arrin të formojë qeverinë.
Deri tani kanë kaluar dy javë që kur VMRO-DPMNE në krye me Nikolla Gruevskin e kanë marrë mandatin nga presidenti i shtetit për formimin e qeverisë së re dhe assesi të pranojë kërkesat e partive shqiptare. Për dallim nga VMRO-ja, LSDM duket më liberale dhe e gatshme që të bëjnë ndonjë kompromis për formimin e qeverisë me partitë shqiptare. M.Krasniqi – /tesheshi.com/
