Qytetarët ende në ankth për terapinë të cilën e marrin, pasi që siguria e ilaçeve në tregun e farmacisë është shumë e pabesueshme.
Këtë e vërteton edhe Inspektorati i Agjencisë së Barnave, pasi ka gjetur 28 paketime të barnave false.
Por për cilat barna bëhet fjalë, kjo gjë nuk u bë e ditur pasi që Prokuroria Themelore është duke kryer hetim.
Sipas drejtorit të kësaj agjencie, Robert Bekirovski, për rastin në fjalë është ngritur padi në Prokurorinë Themelore, dhe për shkak të hetimit nuk mund të zbardhin më shumë detaje.
Ai njoftoi gjithashtu se me ndryshimet ligjore që janë dorëzuar në Kuvend, do të forcohet kontrolli i importit paralel të barnave, ndërsa do të forcohet edhe inspektimi i barnave, sidomos kur bëhet fjalë për insulinën, për të cilën në të kaluarën ka pasur dyshime.
“Ne morëm aktivitete për t’u përballur me barnat e falsifikuara. Ato janë problem në të gjitha sistemet shëndetësore. Shërbimet e inspektimit zbuluan paketime të një ilaçi. Për këto barna, më vonë, në laboratorë të akredituar u dëshmua se janë të falsifikuara dhe nuk u lëshuan për shitje, ndërsa është parashtruar edhe padi në Prokurori. Në interes të procedurës nuk mund të zbuloj më shumë detaje rreth asaj se për cilin ilaç bëhet fjalë”, u shpreh Robert Bekirovski, drejtori i Agjencisë së Barnave. /tesheshi.com/
