Andrea Doviciozo fiton garën e Malajzisë në Moto Grand Prix dhe “nuk e lejon” Mark Markez të festojë titullin.
Piloti i Dukatit “ka bërë të vetën” një garë shiu, e me Markez në vendin e katërt, ndodhet 21 pikë pas spanjollit, një garë para mbylljes së sezonit.
Gara e Malajzisë ka parë 4 pilotë të shkëputen menjëherë, me francezin Zarko që “u arratis” në fillim, e me Lorenzo, Markez e Doviciozo në ndjekje. Më pas pilotët e Dukatit, Lorenzo e Doviciozo kaluan francezin, ndërsa Markez bëri “llogaritarin”, duke mos shtyrë në limit motorrin e tij, edhe nga frika e ndonjë rrëzimi.
Në fund të garës, Lorenzo e uli disi ritmin, mbase edhe prej ndonjë urdhëri “të koduar” të Dukatit, lejoi shokun e skuadrës të parakalojë. Francezi Zarko u ngjit në podium, ndërsa Markez e mbylli në vendin e katërt.
Tashmë titulli kampion do të vendoset në Valencia, ku do të zhvillohet gara e fundit e Moto GP.
Edhe se shanset e italianit Doviciozo janë të pakta, pasi ai duhet të fitojë në Spanjë, e Markez duhet të dalë pa pikë, sporti i motorrëve ka dhuruar gjithnjë surpriza, ndaj konsiderohet sport i adrenalinës.
Për momentin, festë e shtyrë për Mark Markez të Hondës. /tesheshi.com/
