Nga Shkëlzen Rrecaj
Fshati Llapushnik i Komunës së Drenasit ndryshe i njohur edhe si “Gryka e Llapushnikut” ku ka qenë e stacionuar UÇK-ja, por jo edhe i njohur për një problematik se kinse në këtë fshat ka rrënje krishtere.
Disa banorë të këtij fshati, jo numër i madh, vite me parë janë konvertuar në besimin e krishterë. Me kohë ata filluan të kërkojnë një kishë dhe një vend për varreza. Këta banorë bënë një kërkesë në Komunën e Drenasit me 01.03.2010, në emër të komunitetit katolik duke kërkuar që vendin e quajtur “Gradina-Fusha”, të ketë një hapësirë të caktuar për varreza dhe vend për ceremonitë fetare.
Një kërkesë të tillë e kanë bërë edhe administrata apostolike e Prizrenit e cila thotë se Komuniteti Shqiptar Katolik në Llapushnik edhe juridikisht është pjesë e Ipeshkvisë.
Pas kësaj kërkese, kryetari i Drenasit Nexhat Demaku, i ka dhënë 02.50.00 ha tokë të OP “Drenica “ këtyre banorëve pa e pyetur askënd.
Për këtë vendim kanë reaguar edhe banorët me shumicë myslimane duke e kundërshtuar atë, jo në baza fetare porse siç thonë, nuk është pyetur askush, as ata vetë e as asamblistët.
Për këtë arsye, banorëve të komunitetit mysliman i drejtuar kryetarit të Drenasit me një kërkesë duke thënë: “Ne përfaqësues të fshatit Llapushnik jemi të indinjuar me vendimin që ju keni marrë, për arsye se me kohë ju kemi njoftuar hollësisht për rastin dhe ju e dini fare mirë se shumica dërrmuese e këtij fshati jemi të përkatësisë fetare islame, andaj ndihemi të fyer ku për disa individë të cilët janë konvertuar në fenë katolike për përfitime personale materiale, ju keni dhënë këtë tokë për shfrytëzime misionare”, thuhet në kërkesën e banorëve të fshatit.
Po ashtu këta banorë, me herët kanë dorëzuar një kërkesë për ndërtimin e një lapidari për dëshmoret dhe martirët e luftës. Dhe sipas tyre, kjo përbën një tjetër arsye për t`u irrituar.
Për këtë vendim kishte reaguar edhe Bashkësia Islame e Drenasit ku në kërkesën e saj thuhet se “disa individë të caktuar, po edhe ndoshta personalitetë të kishës katolike të Kosovës, janë duke bërë përpjekje të mëdha që në fshatin Llapushnik të KK Drenasit të ndërtojnë një kishë katolike. Këtij aksioni sipas shumë informatave që kemi, i prinë njëfarë Ismet Sopi i pa kurriz në asgjë dhe Bajram Gashi, që është polic i PK”. Sipas BIK-it të Drenasit, “feja islame i pranon fetë tjera dhe deri me tani kemi arritur t’i ruajmë këto vlera, por për rastin konkret ndërtimi i kësaj kishe nuk është nevojë e popullsisë katolike, sepse të këtillë nuk ka në këto anë, thuhet në njoftimin e BIK-ut të Drenasit.
Indiferent nuk kanë qëndruar as OVL e UÇK-së, dega në Llapushnik për dhënien e kësaj toke për kishë që e menaxhon AKP, pa e pyetur askënd.
Banorët me shumicë myslimanë së fundmi janë riaktivizuar duke protestuar për tre ditë radhazi. Ata po kundërshtojnë fuqishëm vendimin e kryetarit Demaku.
Këtyre në ndihmë u ka dalë edhe asambleistit i PDK-së Bujar Thaçi, i cili për portalin tesheshi deklaron: “Ipeshkvia Kosovës ka bërë një kërkesë nga Komuna e Drenasit për ndarjen e një parcele për besimtarët katolikë dhe Komuna ia ka dhënë vendimin, mirëpo ai vendim nuk ka ardhur në Asamble për t’u votuar, madje nuk janë pyetur as administrata e fshatit Llapushnik, as ndonjë banor për këtë vendim. Parcela ku pretendohet të ndërtohet kisha katolike, është një parcelë që para tre viteve është shpallur Zonë e Mbrojtur e UÇK-së. Këto janë ndër arsye kryesore pse ne e kundërshtojmë, por jo se jemi kundër në parim, siç po e shesin çështjen disa media, thekson z. Thaqi.
Sipas tij, nuk ekziston kundërshti ndaj varrezave dhe kishës katolike, por në vendin e vlerave të UÇK-së nuk duhet të ndërtohet as kishë e as xhami. “Ai vend duhet të ruhet me kujdes të madh, sepse shumë beteja të suksesshme ka zhvilluar UÇK-ja aty, dhe jo të shndërrohet në një vend konflikti”, ka thënë Thaçi.
Banorët kërkojnë nga organet kompetente, që të merren me këtë çështje dhe jo të neglizhohen. Po ashtu, ata kërkojnë që Ipeshkvia e Kosovës ta tërheqë kërkesën dhe Komuna e Drenasit ta shfuqizojë këtë vendim sa më shpejt, e të ndërprehen punimet, derisa të gjendet një zgjidhje, në mënyrë që të mos ketë ndonjë problem ndër fetar dhe ndër vëllazëror, sqaroi Thaçi.
Lidhur me vazhdimin e protestave ai deklaroi: “Ne nuk do të ndalemi së protestuari, sepse konsiderojmë që kemi të drejtë ligjore, andaj, nesër (më 22.06.2015, ditë hënë), duke filluar nga ora 10:00, do të protestojmë kësaj radhe para Komunës së Drenasit, në mënyrë që të ju tregojnë zyrtarëve Komunalë, dhe gjithë të tjerëve, se ai vendim është i jashtëligjshëm dhe ta shfuqizojnë”.
Ndërsa këshilltari i pavarur, Vehbi Berisha, për portalin tesheshi deklaroi: “Së pari unë si këshilltar komunal nuk jam kundra varrezave të askujt, sepse secili konfesion fetar duhet t`i këtë varrezat e veta, sepse të paktën zyrtarisht bazuar në vendime jam njoftuar se ajo parcele është nda vetëm për varreza e jo për kishë katolike. Ndërsa unë dua të fokusohem më shumë tek ana ligjore e dokumenteve, sepse edhe për atë jam i thirrur, prandaj në lidhje me këtë rast ne konstatojmë se vendimet e marra nga kryetari i Komunës së Drenasit, Nexhat Demaku, janë përcjellë me një sërë shkeljesh ligjore, që nga rregulloret komunale për organizimin e fshatrave e deri tek ligji për shpronësim, ku këto vendime janë marrë jashtë kompetencave të tija si kryetar Komune, pasi që me ligjet aktuale të vendit të cilat janë në fuqi, një vendim të tillë mundet të merret vetëm nga Kuvendi i Komunës së Drenasit i cili përbëhet prej 31 anëtarëve të cilët zgjedhën me votë të drejtpërdrejt nga ana e qytetareve të Drenasit gjithnjë sipas Ligjit për vetëqeverisje lokale Nr. 03/L-040, Neni 35 i këtij ligji”, theksoi z. Berisha.
Me tej ai shtoi se si i tërë shqetësimi i banorëve të këtij fshati është se e njëjta pjesë e tokës është kërkuar më herët për ndërtimin e lapidarit për dëshmoret dhe martirët e fshatit si dhe për ndërtimin e pistës (vendit të caktuar) për mbajtjen e manifestimit përkujtimor “Epopeja e Grykës së Llapushnikut”. /tesheshi.com/
